Тошкент, Ўзбекистон (UzDaily.uz) — 2024 йил декабрь ойида Андижон шаҳар жиноят ишлари бўйича суди Украинадаги қуролли можарода Россия томонида қатнашган Ўзбекистон фуқаросига ҳукм чиқарди.

Суд материалларига кўра, 39 ёшли Марҳамат тумани фуқароси Т.А. 2023 йил апрель ойида иш излаб Москвага борган. У ерда у Россия Қуролли Кучларига қўшилиш қарорини қабул қилган ва 2023-йил 21 июль куни шартнома имзолаган. Кейинги беш ой давомида у Шахтерск ва Бахмут шаҳарларидаги жангларда қатнашган.

2023 йил 31 декабрь куни у Ўзбекистонга қайтиб, ҳуқуқни муҳофаза қилиш органларига ўз ихтиёри билан бориб, Россия армиясида хизмат қилганини тасдиқловчи ҳужжатларни тақдим этган. Суд мажлисида у ўз айбини тўлиқ тан олиб, ушбу қарорга келишига оғир моддий аҳвол ва оиласининг ягона боқувчиси экани сабаб бўлганини айтган.

Суд уни Ўзбекистон Жиноят кодексининг, 154-моддаси 1-қисми (ёлланма жангчилик) бўйича айбдор деб топди, бу модда 5 йилдан 10 йилгача озодликдан маҳрум қилишни назарда тутади. 154-1-модданинг 1-қисми (чет эл армиясига хизматга кириш) бўйича ҳам айбдор деб топилди, бу эса жарима ёки 3 йилгача ахлоқ тузатиш ишларини назарда тутади.

Бироқ, айбни тўлиқ тан олиши, аввал судланмагани, уч нафар фарзанди борлиги ва чин дилдан пушаймон бўлгани инобатга олиниб, унга 4 йил 2 ой муддатга озодликни чеклаш жазоси тайинланди.Судланувчининг яшаш жойини назорат қилувчи органларнинг рухсатисиз тарк этиши тақиқланади, иш ёки ўқиш билан боғлиқ саёҳатлар бундан мустасно.

Шунингдек, унга Андижон вилоятидан ташқарига чиқиш ҳам тақиқланган.