Тошкент, Ўзбекистон (UzDaily.uz) — 7 январь куни Ўзбекистон элчиси Ғайрат Фозилов (қароргоҳи Брюссель шаҳрида) Валиаҳд Буюк Герцоги Гийом (Вильгельм)га ишонч ёрлиқларини топширди, деб хабар қилмоқда "Дунё" АА мухбири.

Маросим доирасида бўлиб ўтган суҳбатда Валиаҳд Буюк Герцог Ўзбекистон билан муносабатларни ривожлантиришдан манфаатдор эканлигини билдирди. Мулоқот чоғида, шунингдек, икки томонлама муносабатларни ривожлантириш истиқболлари атрофлича муҳокама қилинди.

Суҳбат сўнгида Люксембург Валиаҳд Буюк Герцоги Ўзбекистон элчисини масъулиятли лавозимга тайинлангани билан табриклаб, унинг икки мамлакат ўртасида ҳамкорликни чуқурлаштиришга қаратилган фаолиятини қўллаб-қувватлашга тайёрлигини билдирди.

Ғайрат Фозилов Ўзбекистоннинг Бельгиядаги, шунингдек, ўриндошлик асосида Нидерландия ва Люксембургдаги (қароргоҳи Брюссель шаҳрида) элчиси, Европа Иттифоқи ва НАТО ҳузуридаги ваколатхоналари раҳбари ҳисобланади. 2023 йил 5 декабрда дипломатик миссиясини бажариш учун Брюсселга етиб келган. Бельгияга тайинланишидан олдин у ташқи ишлар вазирининг ўринбосари лавозимида ишлаган.

2024 йилнинг 7 февраль куни Ўзбекистон элчисининг Бельгия Қироли Филиппга ишонч ёрлиқларини топшириш маросими бўлиб ўтди, 2024 йилнинг 14 ноябрь куни эса дипломат Европа Кенгаши Президенти Шарль Мишелга ўзининг ишонч ёрлиқларини топширди . 2024 йилнинг 4 декабрь куни Ўзбекистон элчиси Нидерландия Қироли Виллем-Александрга ишонч ёрлиқларини топширди.