Тошкент, Ўзбекистон (UzDaily.uz) — 2025 йил 14 июль куни Малайзиянинг Куала-Лумпур шаҳрида Ўзбекистон Республикаси делегациясининг ислом молияси, тартибга солиш ва экотизимни ривожлантириш масалаларига оид ўқув сафари бошланди. Мазкур ташриф Осиё тараққиёт банки кўмагида ва Исломий молия соҳасидаги халқаро таълим маркази (INCEIF) ҳамкорлигида ташкил этилди.

Делегация таркибидан Ўзбекистон Республикаси Марказий банки, Иқтисодиёт ва молия вазирлиги, Давлат солиқ қўмитаси ҳамда Адлия вазирлиги вакиллари ўрин олган.

Дастур исломий молияни ривожлантиришнинг асосий жиҳатларини қамраб олади: ҳуқуқий ва тартибга солиш базаси, шариатга мувофиқ бошқарув, солиққа тортиш масалалари, эҳтиёткорлик назорати, бухгалтерия ҳисоби стандартлари ҳамда ликвидлик воситалари.