Тошкент, Ўзбекистон (UzDaily.uz) — Божхона қўмитаси вакиллари тегишли вазирлик ва идоралар масъуллари билан биргаликда Хитойнинг “CGN BeGood Technology” компаниясида бўлиб, бу ерда ишлаб чиқарилаётган замонавий инспекцион кўрик мажмуалари билан яқиндан танишишмоқда.

Хабарингиз бор, яқинда Божхона қўмитаси Раисининг мазкур компания раҳбари билан учрашуви бўлиб ўтган эди ва томонлар мамлакатимиз чегара ўтказиш пунктларини инспекцион кўрик мажмуалари билан жиҳозлашда ўзаро ҳамкорликнинг истиқболли йўналишларини белгилаб олишган эди.

Мазкур икки томонлама учрашувда эришилган келишувларнинг амалий ижроси ва мантиқий давоми сифатида эндиликда ушбу компанияга ишчи сафар ташкил қилинди.

Божхона қўмитасининг Ахборот-коммуникация технологиялари ва киберхавфсизликни таъминлаш бошқармаси бошлиғи A.Дусмухамедов бошчилигидаги делегация компаниянинг ишлаб чиқариш базалари бўлиб, турли турдаги инспекцион кўрик мажмуаларининг ишлаш принциплари, техник жиҳатлари, реал вақтда сканерлаш тизимлари ва бошқа тизимларга интеграциялаш ҳамда сунъий интеллект имкониятларини ўрганишмоқда, компаниянинг инновацион ишланмалари билан яқиндан танишишмоқда.

Айниқса, компания томонидан ишлаб чиқилган мажмуаларнинг Ўзбекистон чегараларидаги транспорт оқимига мутаносиблиги, географик-иқлимий шароитга мослаша олиш даражаси, сервис ва техник хизмат кўрсатиш моделлари ўрганилмоқда.

Сафар якунида Божхона қўмитаси ва мазкур компания ўртасида Инспекцион кўрик мажмуаларини пилот лойиҳа тарзида синовдан ўтказиш бўйича дастлабки техник ва ташкилий келишувга эришиш назарда тутилмоқда.