Тошкент, Ўзбекистон (UzDaily.uz) — Ўзбекистон Республикаси ташқи ишлар вазирининг биринчи ўринбосари Баҳромжон Аълоев Афғонистоннинг дипломатик миссияси раҳбари Абдул Ғаффор Теравий билан учрашув ўтказди.

Учрашувда Афғонистондаги ҳозирги вазият ва узоқ муддатли тинчлик ва барқарорликка эришиш йўллари ҳақида атрофлича фикр алмашилди.

Томонлар ўзбек-афғон муносабатларини янада ривожлантириш истиқболлари, шунингдек, турли соҳалардаги ҳамкорлик масалаларини муҳокама қилди.

Афғонистон миссияси раҳбари Афғонистон бўйича минтақавий позицияни мувофиқлаштиришда ва афғон халқига инсонпарварлик ёрдамини кўрсатишда Ўзбекистоннинг фаол ролини юксак баҳолади.

Учрашув Ўзбекистоннинг қўшни мамлакатда тинчлик жараёни ва барқарорликни қўллаб-қувватлашга содиқлигини яна бир бор тасдиқлади.