Тошкент, Ўзбекистон (UzDaily.uz) — Нўъмон Муҳаммадиев Ўзбекистон адлия вазирининг ўринбосари этиб тайинланди. Тегишли фармон президент томонидан имзоланди.

Адлия вазирлиги маълумотига кўра, 43 ёшли Нўъмон Муҳаммадиев Қашқадарё вилоятида туғилган. У юридик маълумотга эга бўлиб, биринчи даражали адлия маслаҳатчиси унвонига эга. 2024 йилда «Фидокорона хизматлари учун» медали билан тақдирланган.

Фаолиятини 2004 йилда Адлия вазирлигининг бир бўлимида катта маслаҳатчи сифатида бошлаган. 2009–2013 йилларда Тошкент шаҳар адлия бошқармаси бошлиғининг биринчи ўринбосари лавозимида ишлаган. 2016–2023 йилларда Адлия вазирлигининг турли лавозимларида фаолият юритган.

Ҳозирги тайинловга қадар Тошкент шаҳар адлия бошқармасига раҳбарлик қилган.