Тошкент, Ўзбекистон (UzDaily.uz) — Май ойи якунларига кўра, Ўзбекистон марказий банклар орасида олтин савдоси бўйича етакчиликни сақлаб қолди.

World Gold Council (WGC) дастлабки баҳоларига кўра, 2025 йил май ойида жаҳон марказий банклари ўз халқаро захираларидаги олтин ҳажмини 20,0 тоннага оширган. Бу апрель ойига нисбатан 8 тоннага кўпроқ, бироқ сўнгги 12 ой ичидаги ўртача кўрсаткич — 27 тоннадан пастдир.

Май ойида олтин харид қилиш бўйича етакчиликни Қозоғистон Миллий банки эгаллаган. Бир ой давомида Қозоғистон 7 тонна олтин харид қилди. Ундан кейинги ўринларда Туркия ва Полша бўлиб, ҳар бири 6 тоннадан соф олтин харид қилган. Шу билан бирга, Цингапур Валюта бошқармаси (MAS) мазкур даврда 5 тонна олтин сотгани маълум бўлган.

Полша Миллий банки (PMB) марказий банклар орасида олтин харид қилиш бўйича етакчи мақомини сақлаб қолган. Май ойида банк ўз олтин захирасига яна 6 тонна олтин қўшиб, йил бошидан жами 67 тонна олтин харид қилган.

2025 йилнинг беш ойи якунларига кўра, Ўзбекистон жами 27 тонна олтин (шу жумладан май ойида 1 тонна) сотган ҳолда марказий банклар орасида олтин сотиш бўйича етакчиликни сақлаб қолган.