Ушбу ғоя Тадбиркорлар ва ишбилармонлар ҳаракати – Ўзбекистон Либерал-демократик партиясидан Ўзбекистон Республикаси Президентлигига номзод Шавкат Мирзиёевнинг сайловолди дастурида ўз ифодасини топган.

Маълумки, ҳозирги даврда Бирлашган Миллатлар Ташкилотининг Инсонни ривожлантириш концепциясида қайд этилган энг муҳим мезонлардан бири аҳолининг турмуш даражаси, айниқса, ҳаёт сифати одамларнинг ўртача умр кўриш кўрсаткичи билан ҳам ифодаланади. Мустақиллик йилларида халқимизнинг ўртача умр кўриши 1990 йилдаги 67 ёшдан 73,5 ёшга, аёллар ўртасида эса 75,8 ёшга етди. Бугунги кунда республикамизда 60 ёшдан ошган қарийб 2,9 миллион киши истиқомат қилади. Улар орасида 2 мингдан ортиқ Иккинчи жаҳон уруши қатнашчиси, 60 мингдан ортиқ фронт ортида меҳнат қилган инсонлар борлигини алоҳида таъкидлаш лозим. Ўзбекистон узоқ умр кўрувчилар мамлакатига айланаётганлигини мамнуният билан қайд этса бўлади. Буни юртимизда яшаётган табаррук отахон ва онахонларимизнинг 225 минг нафари 80 ёшдан, 44 минг нафари 90 ёшдан, 8700 нафари эса 100 ёшдан ошганлиги ҳам исботлаб турибди. Улар Ўзбекистон фахрийларини ижтимоий қўллаб-қувватлаш “Нуроний” жамғармаси томонидан тегишли ташкилотлар билан ҳамкорликда доимий равишда моддий ва маънавий томондан қўллаб-қувватланиб келинади. Бугунги кунда республикамизда ногиронлар, якка-ёлғизлар яшайдиган 33 та саховат ва мурувват уйлари бор. Айни пайтда уларни қайта қуриш ёки таъмирлаш ишлари амалга оширилмоқда.

Бундан ташқари, 17 минг нафар ёлғиз кексаларга ижтимоий хизматлар кучайтирилиб, ижтимоий соҳа ходимлари уларнинг уй-рўзғор юмушларида кўмаклашмоқдалар, зарур маҳсулотларни уйга етказиб бермоқдалар. Ногиронларимизга зарурат бўлганда ногиронлик аравачаси, кўз гавҳарини қўйиш ёки уларни протез, ортопедик анжомлар билан таъминлаш ишлари амалга оширилиб келинмоқда. Шунингдек, вилоятларда ёшлардан ташкил топган “Ғамхўрлик”, “Мадад”, “Кўмак” гуруҳлари томонидан 5 мингдан ортиқ ўзгалар парваришига муҳтож ва якка-ёлғиз кексаларнинг уй, хўжалик юмушларида яқиндан ёрдам кўрсатилмоқда.

Халқимизда “Қариси бор уйнинг париси бор”, деган ҳикматли нақл бор. Зеро, мўътабар кексаларнинг насиҳатлари, дуолари билан ҳаётимиз файзли, юртимиз тинч ва обод, хонадонларимизда қут-барака барқарор. Шунинг учун ҳам Ўзбекистон Республикаси Президентлигига номзод сифатида кўрсатилган Шавкат Миромонович Мирзиёевнинг сайловолди дастурида “Нуроний” жамғармасининг мақоми ва мавқеини кўтариш, унинг туман, вилоят ва республика тузилмаларининг штат бирликларини кўпайтириш, моддий-техник базасини мустаҳкамлашга алоҳида аҳамият берилади. Хусусан, бу жамғарма келгусида кекса авлод вакилларига том маънода кўмак берадиган фаол ташкилотга айланиши учун барча тегишли чораларни кўриш режалаштирилмоқда. Шунингдек, ёши улуғ инсонлар, ёлғиз кексалар ва имконияти чекланган шахсларга тиббий ёрдам кўрсатиш дас¬тури қабул қилиш кўзда тутилган.

Кўпни кўрган, Ватанимиз равнақи, шаҳар ва қишлоқларимиз ободлиги йўлида беқиёс ҳисса қўшган мўътабар отахон ва онахонларимиз, пиру бадавлат кексаларимизни, ҳар бир юртимиз фуқаросини президентлик сайловларида Тадбиркорлар ва ишбилармонлар ҳаракати – Ўзбекистон Либерал-демократик партияси номзодига овоз беришга чақирамиз.

O‘zLiDeP Матбуот хизмати.