Тошкент, Ўзбекистон (UzDaily.uz) — Ўзбекистон делегацияси ҳокимлар малака ошириш дастури доирасида тажриба алмашиш ва шаҳарларни режалаштириш ҳамда бошқарувнинг илғор тажрибаларини ўрганиш мақсадида Туркияда бўлиб турибди.

Делегацияга «Юксалиш» ҳаракати раиси Бобур Бекмуродов раҳбарлик қилмоқда.

Бундан олдин дастур доирасида Коня ва Селжуклу шаҳарларида учрашувлар ўтказилиб, узоқ муддатли ҳамкорлик ва Туркия ҳамда Ўзбекистон ўртасидаги дўстона алоқаларни мустаҳкамлаш бўйича режалар белгиланган эди.

Навоий ҳокими Дилмурод Эргашев ва Зейтинбурну мери Омер Арисойнинг учрашуви ташрифнинг муҳим воқеаларидан бири бўлди. Учрашув давомида Навоий (Ўзбекистон) ва Зейтинбурну (Истанбул, Туркия) ўртасида биродар шаҳар мақомида ҳамкорлик протоколи имзоланди.

Зейтинбурну қулай жойлашуви туфайли муҳим иқтисодий ва савдо маркази ҳисобланади. Бу ерда кўплаб фабрикалар, бозорлар ва савдо марказлари жойлашган. Текстиль саноатидан ташқари, Зейтинбурну логистика ва транспорт соҳаларида ҳам муҳим ўринга эга.

Икки томонлама ҳужжат иқтисодий ҳамкорлик, таълим, соғлиқни сақлаш, ёшлар сиёсати ва спорт, туризмни ривожлантириш ҳамда маданий меросни асраб-авайлаш, экологик ташаббуслар, энергетика, ахборот технологиялари ва транспорт каби кенг йўналишларни қамраб олади.

Томонлар мутахассислар алмашинуви, бизнес ҳамжамиятлари ва инвесторларга кўмак бериш масалаларида келишиб олди. Ҳамкорликнинг муҳим жиҳатларидан бири ижтимоий ҳимояга муҳтож аҳоли қатламлари, жумладан, болалар, ногиронлар ва кекса фуқароларни қўллаб-қувватлашдир.

Ташриф доирасида Ўзбекистон делегацияси Зейтинбурнудаги замонавий шаҳар режалаштириш лойиҳалари билан танишди. Шаҳар муҳитини ободонлаштириш, экология ва инфратузилма соҳасида инновацион ечимларни жорий этиш масалаларига алоҳида эътибор қаратилди.

Эслатиб ўтамиз, 10 февраль куни Ўзбекистон делегациясининг Туркияга ташрифи доирасида Самарқанд ва Коня ўртасида биродар шаҳар мақомида ҳамкорлик протоколи имзоланган эди.