Тошкент, Ўзбекистон (UzDaily.uz) — Мўғулистон қўйларининг биринчи партияси ҳаво транспорти орқали Ўзбекистонга етказилди. Бу ҳақда Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси хабар берди.

Қўмита раиси Баҳром Норкобилов ишчи гуруҳ билан бирга чорвачилик соҳасида эришилган келишувлар ижросини назорат қилиш мақсадида Мўғулистонга ташриф буюрди. У Навоий вилоятига йўналтирилган «Баяд» зотли 1000 қўйни юклаш жараёнида шахсан иштирок этди.

Режага кўра, жорий йил октябрь ойи охиригача 60 та авиация рейси амалга оширилиб, Ўзбекистонга 50 минг бош майда шохли қўй-эчки олиб келинади. Ноябрь ва декабрь ойларида яна шунча чорва ҳайвони кириб келиши кўзда тутилган бўлиб, бу кўрсаткични 100 минг бошга етказиш имконини беради.

Ташриф давомида Ўзбекистон вакиллари Мўғулистон Бош вазир ўринбосари Саинбуян Амарсайхан билан музокаралар ўтказдилар. Уларнинг натижасида қўй ва эчкилар экспорти учун божхона тўловлари қарийб уч баробарга — ҳар бир бошига 18 доллардан 7 долларгача пасайтиришга келишиб олинди.

Мўғулистон чорвасини етказиб бериш бўйича келишув жорий йил июн ойида Ўзбекистон Президенти Шавкат Мирзиёевнинг Мўғулистон Президенти Ухнаагийн Хурэлсух билан учрашуви чоғида имзоланган эди. 2029 йилга қадар Ўзбекистондаги мўғул қўй ва эчкилари сонини 1 миллион бошга етказиш режалаштирилган.

Импортни рағбатлантириш мақсадида Президент томонидан Мўғулистондан ҳаво транспорти орқали майда шохли чорвани олиб келиш харажатларининг 50 фоизини қоплаш тартиби жорий этилди.

Бундан ташқари, импортёрларга қўшилган қиймат солиғини тўлаш бўйича муддатли тўлов, 10 фоизлик йиллик ставкада беш йиллик имтиёзли кредит ва камайтилиган гаров талаблари асосида маблағ ажратилади. Шунингдек, мамлакатнинг етти ҳудудида уларга селекцион ишларни олиб бориш учун тўғридан-тўғри ижарага яйлов ерлари берилади.