Тошкент, Ўзбекистон (UzDaily.uz) — Монголия бош вазирининг ўринбосари Тогмидин Доржханд бошчилигидаги делегация Ўзбекистонга ташрифи доирасида Тошкентдаги офисимизда Жаҳон банки жамоаси билан учрашди. Самарали ўтган фикр алмашиш давомида делегация Банк кўмагида Ўзбекистонда энергетика секторида амалга оширилаётган ислоҳотлар тажрибаси билан танишди.

Жаҳон банки ходимлари 2017 йилдан бошланган энергетика секторидаги ислоҳотларни қандай баҳолаганлари билан бўлишишди ҳамда мамлакатнинг саъй-ҳаракатлари ва Жаҳон банкининг мамлакат электр энергияси улгуржи ва чакана бозори ривожланиши, электр энергиясини узатиш инфратузилмасини модернизация қилиш ва қайта тикланувчи энергия манбаларига хусусий инвестицияларни жалб қилишда кўрсатган кўмагини алоҳида таъкидлади.

Шунингдек, Ўзбекистон ҳукуматининг марказлашган иситиш тизимини такомиллаштириш, энергия самарадорлигини ошириш ва "яшил" иқтисодиётга ўтишни рағбатлантириш борасидаги жорий саъй-ҳаракатлари, шу жумладан Банк томонидан тақдим этилаётган техник ёрдам ва молиялаштирилаётган лойиҳаларни амалга ошириш орқали, алоҳида қайд этилди.

Делегация Монголия ва Марказий Осиё мамлакатлари экспертлари ва амалиётчилари ўртасидаги билим алмашиш жараёнини янада мустаҳкамлашга қизиқиш билдирди. Жаҳон банки вакиллари ташкилотнинг ушбу жараённи давом эттиришга, мижоз мамлакатларимизнинг салоҳиятини мустаҳкамлаш бўйича ўз ишининг бир қисми сифатида ёрдам беришга тайёрлигини таъкидлади.