Тошкент, Ўзбекистон (UzDaily.uz) — Марказий банкда кредитларни қайта молиялаштириш соҳасидаги қонунчиликни такомиллаштиришга бағишланган ишчи гуруҳ йиғилиши бўлиб ўтди, деб хабар бермоқда регулятор матбуот хизмати.

Муҳокамалар давомида иштирокчилар Марказий банкнинг меъёрий-ҳуқуқий ҳужжатларига киритилиши режалаштирилган ўзгаришлар билан танишдилар. Бу ўзгаришлар қайта молиялаштириш бозорини ривожлантиришга қаратилган. Хусусан, қайта молиялаштирилаётган кредитлар бўйича тўловларни қарз олувчиларнинг қарз юки кўрсаткичи ҳисоб-китобидан чиқариб ташлаш таклиф этилмоқда.

Шунингдек, амалдаги қарздорликни анча қулай шартлар асосида қайта молиялаштириш учун янги кредит шартномаларини тузишга мижозларни рағбатлантириш ноҳақ амалиёт деб ҳисобланмаслиги белгилаб қўйилмоқда. Шу билан бирга, фоизларнинг капитализация қилиниши билан берилган кредитлар фақат 30 кун ичида ҳисобланган фоизлар доирасида бўлса, қайта кўриб чиқилган активлар деб тан олинмаслиги белгиланмоқда.

Банк вакиллари қайта молиялаштириладиган кредитларнинг кафолатланиши масалалари, шунингдек, қайта молиялаштириш ва кредит шартларини ўзгартириш ўртасида аниқ фарқ белгилаш зарурлиги ҳақида фикр билдирдилар.

Йиғилишда битта кредитни қайта молиялаштириш амалиётини бир марта билан чеклаш, шунингдек, янги кредит суммасининг бошланғич қарз миқдоридан ортиқ бўлиши мумкинлиги ҳақида таклифлар муҳокама қилинди. Шунингдек, банк портфелидаги қайта молиялаштирилган кредитлар улушини чеклаш имконияти кўриб чиқилди.

Марказий банк ўзининг устувор вазифалари қаторида банклар ўртасида рақобатни кучайтириш, аҳоли учун ортиқча қарз юкини олдини олиш ва молиявий хизматлардан фойдаланиш имкониятларини кенгайтиришга эътибор қаратишини таъкидлади.

Шунингдек, онлайн кредитларни қайта молиялаштириш хизматларини жорий этиш масаласига алоҳида эътибор қаратилди. Регулятор бозор иштирокчиларининг таклифларини ҳисобга олишга тайёрлигини билдирди.