Тошкент, Ўзбекистон (UzDaily.uz) — Қишлоқ хўжалиги соҳаси аввалгидек эмаслиги, эндиликда, у илм-фанга асосланган. Сўнгги вақтларда учувчисиз бошқариладиган қурилма — дронлар хизматидан турли йўналишларда фойдаланиш анча оммалашди. Шу мақсадда, Янгийўл тумани ҳокими О. Атауллаев Малайзиянинг қишлоқ хўжалиги технологиялари соҳасида етакчи бўлган “Meraque Group Snd Bhd” компанияси вакиллари билан учрашди.  

Компания раҳбари Ли Исмаил ҳудудни ўрганар экан, полиз ва дуккакли экинлар етиштиришда энг сўнгги дрон технологияларини жорий этиш учун қулай муҳит эканлигини таъкидлади. Бу каби дронлар агрокимёвий ишлов жараёнларини юқори аниқлик, тезлик ва ресурсларни тежаган ҳолда бажаришга қодирлиги кўрсатилди.

Хабарингиз бор, 2024 йил февраль ойида Қишлоқ хўжалиги вазирлиги ҳамда мазкур компания ўртасида ақлли қишлоқ хўжалиги техникалари, дронларни маҳаллийлаштиришга қаратилган келишув битими имзоланган эди. 

Шу мақсадда, ушбу лойиҳани ҳаётга татбиқ этиш мақсадида икки томон ўртасида бир қатор келишувлар амалга оширилди. Яъни, 3 миллион доллар миқдорида бошланғич инвестиция киритиш эвазига, маҳаллий кадрлар кўмагида илк техникалар 2026 йил июль ойидан ишлаб чиқарила бошлайди.