Тошкент, Ўзбекистон (UzDaily.uz) — Мадриднинг машҳур "Реал" клуби Франциянинг "Ланс" ва Ўзбекистон миллий терма жамоасининг 20 ёшли ҳимоячиси Абдуқодир Ҳусановга жиддий қизиқиш билдирмоқда. Бу ҳақда Foot Mercato нашри журналисти Санти Ауна X (илгари Twitter) ижтимоий тармоғида хабар берди.

Foot Mercato нашрининг маълумотига кўра, Ҳусановга 10 дан ортиқ клуб қизиқиш билдирган, улар орасида Испания чемпионатининг кучли жамоалари ҳам бор.

Испания клуби вакиллари футболчининг атрофидаги шахслар билан алоқа ўрнатгани ҳақида хабар қилинди.

Илгариги маълумотларга кўра, Ҳусановга "Манчестер Сити" ва "Атлетико Мадрид" каби Европа клублари ҳам қизиқиш билдирган.

"Ланс" клуби Ҳусановни қишки трансфер ойнасида сотишни режалаштирмоқда ва 25 миллион евродан ортиқ таклифларни кўриб чиқишга тайёр.

Абдуқодир Ҳусанов ўз фаолиятини "Бунёдкор"да бошлаган, сўнгра Беларуснинг "Энергетик-БГУ" клубида ўйнаган. У 2023 йил ёзида "Ланс"га 100 минг евро эвазига кўчиб ўтди ва шу пайтдан бери клубнинг асосий ҳимоячисига айланиб, Европа футболида эътибор қозонди.