Тошкент, Ўзбекистон (UzDaily.uz) — Франциянинг "Ланс" футбол клуби бош директори Пьер Дреосси марказий ҳимоячи Абдулкодир Ҳусановнинг катта эҳтимол билан жамоани тарк этишини тасдиқлади.

Ўзбекистон миллий терма жамоаси ҳимоячиси Абдулкодир Ҳусановга Англия Премьер-лигасининг бир қатор клублари, жумладан, "Манчестер Сити" қизиқиш билдирмоқда.

Ҳусанов ўзига хос ҳимоявий маҳоратни намойиш этиб, бош мураббий Вилл Стил тактикасининг муҳим фигурасига айланди.

20 ёшли футболчининг трансфери билан шуғулланиш учун Gestifute агентлиги раҳбари Жорже Мендеш ваколат олган.

DAZN нашрига 1-лига доирасидаги "Тулуза"га қарши ўйиндан олдин берган интервьюсида Дреосси Ҳусановнинг клубни тарк этишини ишонч билан таъкидлади, аммо унинг кетиши қишки трансфер ойнасидами ёки ёзда амалга оширилишини аниқламади.

Шунингдек, у Ҳусановнинг кетиши яхши таклифлар бўлса, клубнинг молиявий ҳолатини яхшилашга ёрдам беришини қўшимча қилди.

Таъкидлаш жоизки, Абдулкодир Ҳусанов дисквалификация сабабли "Тулуза"га қарши ўйинда иштирок этмади ва унинг жамоаси 0:1 ҳисобида мағлуб бўлди.