Тадбир чоғида минтақа кун тартибининг долзарб масалалари, шунингдек Марказий Осийода кўп томонлама ҳамкорлик механизмларини янада ривожлантириш бўйича сермазмун ва батафсил фикр алмашилди.

Йиғилиш якунларига кўра Қўшма баёнот қабул қилинди.

Ҳужжатда 2019 йил март ойида Тошкентда бўлиб ўтадиган навбатдаги Марказий Осиё давлат раҳбарлари маслаҳатлашув учрашувининг муҳимлиги алоҳида таъкидланган. Бундан ташқари хавфсизликни таъминлаш, минтақа давлатларининг савдо-иқтисодий алоқаларини фаоллаштириш, Марказий Осиёнинг транзит-транспорт салоҳиятларини кенгайтириш соҳаларидаги ҳамкорликни янада ривожлантиришнинг зарурлиги қайд этилган.

Ўзбекистон ТИВ раҳбари Абдулазиз Камилов тадбир қатнашчиларини жорий йилнинг октябрь ойида ўтказилиши режалаштирилган Марказий Осиё давлатларининг Минтақавий иқтисодий форуми ишида иштирок этишга таклиф этди.

Марказий Осиё давлатлари ташқи ишлар вазирларининг мазкур учрашуви минтақадаги барча мамлакатларнинг дўстлик, яхши қўшничилик, ҳамжиҳатлик ва ишонч анъаналарига асосланган минтақавий ҳамкорлигини янада кенгайтириш ва чуқурлаштириш борасидаги сайъ-ҳаракатларининг мантиқий ва табиий давоми бўлди.