Тошкент, Ўзбекистон (UzDaily.uz) — 2025 йил 19 июнь куни Ўзбекистон Республикаси Бош вазири ўринбосари Жамшид Ходжаев Петербург халқаро иқтисодий форумида (ПХИФ) иштирок этди. Тадбир доирасида у “Энергетика бозоридаги глобал мувозанат: ишлаб чиқарувчилар ва истеъмолчилар манфаатлари ўртасида мувофиқлик излаш” мавзусидаги панель сессиясида нутқ сўзлади.

Мазкур муҳокамада ОПEК Бош котиби Ҳайсам ал-Гайс, Туркия Энергетика ва табиий ресурслар вазири Алпарслан Байрактар, Баҳрайн Нефть ва атроф-муҳит вазири Муҳаммад бин Муборак бин Дайна, Россия Федерацияси Ҳукуматининг Раис ўринбосари Александр Новак ҳамда Венгрия ва Сербия вазирликлари вакиллари иштирок этди.

Жамшид Ходжаев ўз нутқида, Ўзбекистоннинг «яшил» энергетикани ривожлантиришга қатъий интилаётганини, бу борада мамлакатнинг табиий салоҳияти ва инвесторлар учун яратилган қулай шарт-шароитларга таянганини алоҳида таъкидлади:

“Сўнгги йилларда амалга оширилган изчил институционал ва ҳуқуқий ислоҳотлар Ўзбекистоннинг инвестицион жозибадорлигини, хусусан, яшил энергетика соҳасида тубдан ўзгартирди. Бугун ёқилғи-энергетика тизими мисли кўрилмаган трансформацияни бошдан кечирмоқда, ва энергетик ўтиш ишлаб чиқарувчилар ва истеъмолчилар ўртасидаги ўзаро ҳамкорликнинг янги тамойилларини шакллантирмоқда.”

Шундай қилиб, Ўзбекистонда «яшил» ўтишнинг асосини нафақат табиий ресурслар, балки бозор тамойилларига асосланган рағбатлантирувчи ва ҳуқуқий механизмлар тизими ҳам ташкил этади.

“Ўзбекистон Республикаси Президенти Шавкат Мирзиёев раҳбарлигида энергетика тизимини модернизация қилишга қаратилган кенг кўламли ислоҳотлар амалга оширилди. Натижада, энергия тизимининг ўрнатилган қуввати 50 фоизга ошиб, 25 ГВт га етди. Қуёш ва шамол энергетикаси асосида 3,5 ГВтдан ортиқ қувватлар ишга туширилди. Энергия сақлаш имкониятлари ҳам босқичма-босқич кенгаймоқда. 2030 йилга бориб электр энергияси ишлаб чиқаришни 135 миллиард кВт·соатга етказиш, қайта тикланувчи энергия манбаларининг ўрнатилган қувватини эса 5 баробардан кўпроққа — 20 ГВтдан ошириш режалаштирилган дастур қабул қилинди. Шунингдек, Европа мамлакатларига «яшил» энергия экспортини ўз ичига олган минтақавий ташаббуслар ҳам амалга оширилмоқда,” — дея таъкидлади Жамшид Ходжаев.

Панель сессияси иштирокчиларига, соҳага оид барча лойиҳалар давлат-хусусий шериклик тамойиллари асосида ва тўғридан-тўғри инвестицияларни жалб этган ҳолда амалга оширилаётгани ҳақида ҳам маълумот берилди.

“Ўзбекистонда қуёш, шамол ва сув ресурсларидан фойдаланиб янги электр ишлаб чиқариш қувватларини яратиш учун улкан имкониятлар мавжуд — бу Худонинг инъомидир. Энг тўғри йўл — бу салоҳиятдан тўлиқ фойдаланишдир, айниқса, инвесторларни жалб этувчи қулай инвестиция муҳити яратилган шароитда,” — деди спикер.