Тошкент, Ўзбекистон (UzDaily.uz) — 6 февраль куни IT Park Uzbekistan вакиллари Европа ва Марказий Осиё бўйича директор Алан Ео бошчилигидаги “Enterprise Singapore” делегацияси билан учрашув ўтказдилар. Томонлар Cингапурга ташрифларни ташкил этиш ва “Enterprise Singapore”нинг Ўзбекистондаги тадбирларда иштирок этишини ҳам муҳокама қилдилар.

“Enterprise Singapore” — Cингапур ҳукуматининг Савдо ва саноат вазирлиги қошидаги ташкилот. У 2018 йил 1 апрелда Cингапур кичик ва ўрта корхоналарини (КЎК) ривожлантириш, уларнинг салоҳиятини ошириш, инновацияларни жорий этиш, трансформация ва халқаролаштириш жараёнларини қўллаб-қувватлаш мақсадида ташкил этилган. “Enterprise Singapore” Cингапурнинг савдо ва стартап маркази сифатида ўсишини қўллаб-қувватлаб, стандартлаштириш ва аккредитация бўйича миллий орган вазифасини бажармоқда.

IT Park ва “Enterprise Singapore” 2022 йилдан буён ҳамкорлик қилиб, Ўзбекистон ва Cингапур бозорлари имкониятлари ҳақида хабардорликни ошириш, шунингдек, Cингапур компанияларининг Ўзбекистонда ўз ваколатхоналарини очишини қўллаб-қувватлаш соҳасида фаол иш олиб бормоқда.

Учрашувда келгусидаги ҳамкорлик имкониятлари, жумладан: “UOC Singapore” каби қўшма тадбирларни ташкил этиш, шунингдек, Cингапур компанияларини Ўзбекистонга ташриф буюришга таклиф қилиш масалалари муҳокама қилинди. Томонлар, шунингдек, ўзбекистонлик стартапларнинг «Slingshot» танловидан ўтиш шарти билан «SWITCH»да иштирок этиш имкониятини кўриб чиқдилар.

IT Park  ва “Enterprise Singapore” вакиллари “Enterprise Uzbekistan” марказини ишга тушириш доирасида қонунчилик ташаббуслари ва илғор тажрибалар бўйича тажриба алмашишга келишиб олдилар.

IT Park хизматлар экспортини ривожлантириш бўйича директори Маҳлиё Муксинова ITES соҳасини ривожлантиришда IT Park ва “Enterprise Singapore” ўртасидаги ҳамкорлик муҳимлигини таъкидлади, шунингдек, Ўзбекистонда ушбу соҳада рўй берган ижобий ўзгаришлар ҳақида маълумот берди.

Алан Ео Ўзбекистоннинг жадал ривожланишини юқори баҳолаб, Ўзбекистон ҳукумати соҳани ривожлантиришга қатъият билан ёндашганини таъкидлади. “2022 йилда IT Park билан ҳамкорликни бошлаганимизда, вазият ҳозиргидан тубдан фарқ қиларди. Ҳар бир ташрифимизда Ўзбекистон экотизимидаги ижобий ўзгаришлар ва ўсишни кўрмоқдамиз.”

Cингапурлик ҳамкасблар ҳамкорликни мустаҳкамлаш ва компанияларнинг Cингапур ва Ўзбекистон бозорларига киришини келгусида биргаликда қўллаб-қувватлашга умид билдирдилар.

“Enterprise Singapore” лойиҳасини амалга ошириш бўйича маслаҳатчи Амир Мардиев “Enterprise Singapore” билан алоқаларни мустаҳкамлаш муҳимлигини таъкидлаб, ташкилотлар тузилмасидаги қисман ўхшашлик ва келажакда ҳамкорлик қилиш имкониятларини кўрсатиб ўтди.

Томонлар Cингапурга ташрифларни ташкил этиш ва “Enterprise Singapore”нинг Ўзбекистондаги тадбирларда иштирок этишини ҳам муҳокама қилдилар. Cингапур томони вакиллари тадбирларни ташкил этиш ва Ўзбекистонга ташриф буюрадиган ишбилармонлар делегациясини шакллантиришда ёрдам беришга тайёрлигини билдирди.

IT Park Cингапурлик ҳамкорларнинг ташрифини, жумладан B2G ва B2B учрашувларини, ҳудудларга саёҳатларни ва резидент компаниялар билан танишишни ташкил этишга тайёрлигини маълум қилди.

Учрашув якунида томонлар икки мамлакат IT-экотизимини ва стартап саноатини ривожлантириш соҳасида ҳамкорликни янада кучайтириш муҳимлигини таъкидладилар, бу эса тадбиркорлар учун янги имкониятлар очади ва Ўзбекистон ҳамда Cингапур ўртасидаги иқтисодий алоқаларни мустаҳкамлайди.