Тошкент, Ўзбекистон (UzDaily.uz) — Озарбайжон Республикаси Миллий Мажлиси депутати, Маданият қўмитаси раисининг ўринбосари Гюнай Эфендиева «Ўзбекистон маданияти елчиси» фахрий унвони ва медали билан тақдирланди.

Тантанали тақдирлаш маросими Тошкент шаҳрида бўлиб ўтди. Мукофотни Ўзбекистон Республикаси маданият вазири Озодбек Назарбеков тантанали равишда топширди.

Маросимда сўзга чиққан вазир таъкидладики, Президент топшириғига асосан, ўзбек маданиятини хорижда тарғиб қилиш ва ривожлантиришга қаратилган ташаббусларни қўллаб-қувватлашга алоҳида эътибор қаратилмоқда. Шу нуқтаи назардан у Гюнай Эфендиеванинг Ўзбекистоннинг бой тарихий-маданий меросини халқаро майдонда тарғиб қилишдаги хизматларини алоҳида қайд этди.

Ўз навбатида, Гюнай Эфендиева унга кўрсатилган юксак эътибор ва фаолиятига берилган баҳо учун самимий миннатдорлик изҳор этди.

У таъкидладики, Озарбайжон ва Ўзбекистон ўртасидаги маданий алоқаларни мустаҳкамлаш доим унинг устувор вазифаларидан бири бўлган, ва келгусида ҳам икки дўст халқ ўртасидаги гуманитар ҳамкорликни ривожлантиришга фаол ҳисса қўшишга тайёрлигини билдирди.

Учрашув доирасида томонлар маданият соҳасидаги ҳамкорликнинг долзарб йўналишларини, жумладан, Озарбайжон ва Ўзбекистон ўртасида дипломатик муносабатлар ўрнатилганига 30 йил тўлиши муносабати билан режалаштирилаётган тадбирларга тайёргарлик масалаларини муҳокама қилишди.

Шунингдек, икки халқ ўртасидаги мустаҳкам маданий ва тарихий ришталар келгусида ҳам мустаҳкамланиб, самарали ҳамкорлик асоси бўлиб қолишига ишонч билдирилди.