Тошкент, Ўзбекистон (UzDaily.uz) — 21-ноябрь куни Тошкент аэропортида Саудия Арабистони "Flyadeal" авиакомпаниясининг келган биринчи рейси кутиб олинди. Бортида 320 нафар йўловчи бўлган самолёт Тошкент вақти билан соат 23:40 да пойтахтга қўнди. Анъанага кўра, самолёт сув аркаси, экипаж эса гуллар билан кутиб олинди. Биринчи рейсни тантанали кутиб олиш маросимида “Uzbekistan Airports” аксиядорлик жамияти вакиллари, оммавий ахборот воситалари ҳамда авиаспоттерлар иштирок этди.

Жидда – Тошкент – ​​Жидда йўналиши бўйича мунтазам равишда тўғридан-тўғри рейслар Airbus A330 самолётларида ҳафтасига беш марта душанба, чоршанба, пайшанба, жума ва якшанба кунлари амалга оширилади. 1-декабрдан бошлаб самолётлар шу йўналишда ҳар куни парвоз қилиши режалаштирилган. Бундан ташқари, 15-декабрдан бошлаб "Flyadeal" Жиддадан Наманганга ҳам парвозларни йўлга қўяди.

“Бугун "Flyadeal" Ўзбекистон аэропортларига парвозларни амалга оширувчи халқаро авиакомпаниялар қаторига кирди ва "Uzbekistan Airports" компаниясининг янги ҳамкорига айланди. Бундан ташқари, ушбу авиаташувчи ҳақида сўз юритганда, бу ёш ва тез ривожланаётган авиакомпаниялардан бири эканлигини таъкидлаш керак. Шунингдек, яқин вақт ичида Жидда – Наманган ва Мадина – Тошкент йўналиши бўйича қўшимча йўналишлар йўлга қўйилиши кўзда тутилган”, - деди “Uzbekistan Airports” раҳбари Жавлонбек Умарходжаев.

"Flyadeal" йўловчиларга юқори даражадаги хизмат кўрсатиш, қулай жадваллар ва парвозлар учун ҳамёнбоп нархларни тақдим этишга интилади. Ишончимиз комилки, ушбу рейсларнинг йўлга қўйилиши Ўзбекистон ва Саудия Арабистони ўртасидаги ҳаво алоқаларини ривожлантиришда муҳим қадам бўлиб, Саудия Арабистонига умра ва ҳаж зиёратларини амалга ошириш учун борадиган йўловчилар учун ҳаво қатновларини ҳамёнбоп қилади”, - дейди "Flyadeal" компаниясининг Ўзбекистондаги вакили Дилмуродхон Бахтиёрхонов.

"Flyadeal" Саудия Арабистонининг арзон ҳаво ташувларини амалга оширувчи авиакомпанияси бўлиб, Жиддадаги Қирол Абдулазиз халқаро аэропортида жойлашган. Авиакомпания Саудия Арабистонининг асосий авиаташувчиси "Саудиа" томонидан 2017-йилда "Saudia Group" нинг трансформатсия стратегияси доирасида ташкил этилган.