Тошкент, Ўзбекистон (UzDaily.uz) — “Fitch Ratings” халқаро рейтинг агентлиги Ўзбекистон кредит рейтингини “BB-” дан “BB” даражасига оширди ва “Иссиқлик электр станциялари” акциядорлик жамиятининг ҳам халқаро кредит рейтингини “BB” даражада деб баҳолади.

Бу 2018-йилдан бери кузатилаётган биринчи ўсиш ҳолатидир. “Fitch Ratings” ҳисоботида “Иссиқлик электр станциялари” АЖ иқтисодий барқарорликни сақлаш йўлидаги ютуқлар алоҳида эътироф этилган.

“Fitch Ratings” халқаро рейтинг агентлиги томонидан 26 июнь куни Ўзбекистон суверен кредит рейтингига бағишланган навбатдаги ҳисобот эълон қилинди. Унга кўра, Ўзбекистон суверен кредит рейтинги баҳоси 2018 йилдан бери илк бор “BB-”дан бир поғона юқорига, “BB” даражасига оширилди ва рейтинг кутилмаси барқарор даражада деб тасдиқланди.

Шунга кўра, 1 июль санасида “Fitch Ratings” халқаро рейтинг агентлиги “Иссиқлик электр станциялари” АЖ халқаро индикатив рейтингини ҳам “BB” даражада деб баҳолади ва Ўзбекистон Республикасининг суверен кредит рейтингига тенг даражада деб эълон қилди.

Шунингдек, мазкур рейтинг, “Иссиқлик электр станциялари” акциядорлик жамиятининг жаҳон инвестиция бозорларида аниқ ва равшан бизнес стратегиясига, шаффоф молиявий ҳолатга ҳамда кучли корпоратив бошқарув тизимига эга корхона позициясини сақлаб қолади.