Тошкент, Ўзбекистон (UzDaily.uz) — Еттита халқаро ва маҳаллий инвесторлар «Автоойна» МЧЖнинг устав капиталидаги давлат улушини сотиб олишга қизиқиш билдиргани ҳақида Ўзбекистон давлат активлари агентлиги хабар берди.

Агентлик маълумотларига кўра, хусусийлаштириш бўйича маслаҳатчи сифатида фаолият юритувчи Portfolio Investments компанияси етти инвестордан аризалар олган. Барча даъвогарлар хусусийлаштириш жараёнининг кейинги босқичида иштирок этиш ҳуқуқига эга бўлдилар.

Махфийлик тўғрисидаги келишув (NDA) имзоланганидан сўнг иштирокчиларга маълумотларни виртуал маълумотлар хонаси (VDR) орқали олиш имконияти яратилади. У ерда активларнинг молиявий, юридик ва операциявий ҳолатига оид батафсил маълумотлар, шунингдек, маслаҳатчи томонидан тайёрланган таҳлилий ҳисобот тақдим этилади. Бу ҳисобот иштирокчиларга мажбурий таклифларни (BO) шакллантириш учун хизмат қилади.

Активларни сотиб олиш бўйича мажбурий таклифлар 2025 йил 15 март куни соат 23:59 (Тошкент вақти) га қадар қабул қилинади.

Шу вақтгача иштирокчилар электрон савдо платформаси «E-auksion»даги шахсий кабинетлари орқали таклиф этилаётган сумма қийматининг камида 1% миқдорида кафолат тўловини киритиши керак. Бу тўлов жараён якунлангач иштирокчиларга қайтарилади. Бироқ, хусусийлаштириш жараёни ғолиби учун бу тўлов сотиб олиш суммасининг бир қисми сифатида ҳисобланиб, хусусийлаштириш фондига йўналтирилади.

«Автоойна» компанияси турли хил ва ўлчамдаги автомобиль ойналари (150 дан ортиқ тур) ишлаб чиқаради. Ишлаб чиқариш қуввати йилига 420 мингдан ортиқ маҳсулотни ташкил этади. Корхона Bystronic Glass (Швейцария), Cugher, Ctriulzi, Mario Argiro, Kera Glass (Италия), Glassrobots, Pilkington (Финландия) ва Vetrotool (Испания) каби халқаро брендларнинг технологияларини қўллайди.