Тошкент, Ўзбекистон (UzDaily.uz) — Қозоғистон ва Ўзбекистон ўртасидаги «Довуд ота» чегара-божхона назорати пунктининг вақтинча ёпилиши 2025 йил 1 сентябргача узайтирилди. Бу ҳақда Қозоғистон Республикаси Молия вазирлиги Давлат даромадлари қўмитаси маълум қилди.

Эслатиб ўтамиз, аввалроқ ушбу чегара пости 2025 йил 1 февралдан бошлаб 3 ой муддатга ёпилади, дея эълон қилинган эди.

Ёпилиш муддати узайтирилиши Ўзбекистон томони билан келишилган ҳолда, «Тажен» чегара постида олиб борилаётган қурилиш ва реконструкция ишлари туфайли амалга оширилди. Ушбу ишлар қуйидагиларни ўз ичига олади:

капитал таъмирлаш,

муҳандислик тармоқларини янгилаш,

нейтрал ҳудуддаги йўл инфратузилмасини такомиллаштириш.

Мутахассислар таъкидлашича, чегарадан ўтишни режалаштираётган фуқаролар ушбу чекловларни инобатга олишлари лозим.

Аҳоли ва ташувчиларга альтернатив йўналишлардан фойдаланиш тавсия этилади.