Тошкент, Ўзбекистон (UzDaily.uz) — Хитойнинг "China Eastern Airlines" авиакомпанияси илк бор Ўзбекистон бозорига кириб, Циан – Тошкент – Циан йўналиши бўйича мунтазам йўловчи қатновларини йўлга қўйди.

16 июль куни соат 14:50да авиакомпаниянинг биринчи рейси Тошкент халқаро аэропортига келиб қўнди. Бортида 137 нафар йўловчи бўлган самолёт анъанага кўра сув аркаси, экипаж аъзолари эса гуллар ва байрамона муҳит билан кутиб олинди.

"China Eastern" компанияси Буюк Ипак йўлининг икки қадимий пойтахти – Циан ва Тошкент ўртасида тўғридан-тўғри ҳаво қатновини очганидан фахрланади. Ишончимиз комилки, бу йўналиш сайёҳлик ва ишбилармонлик саёҳатлари учун янги уфқларни очиб, мамлакатларимиз ўртасидаги дўстлик ва ҳамкорлик кўпригига айланади. Биз барча йўловчиларга юқори даражадаги хизмат кўрсатиш, хавфсизлик ва қулайликни тақдим этишга интиламиз”, - деди авиакомпания вакили Чжу Суэмин.

Парвозлар ҳафтасига уч марта - душанба, чоршанба ва жума кунлари қулай Airbus А320 самолётларида амалга оширилади.

Саёҳат вақти тахминан 4,5 соатни ташкил қилади.

China Eastern 1988 йилда ташкил этилган, бош қароргоҳи Шанхайда жойлашган Хитойнинг энг йирик авиакомпанияларидан бири ҳисобланади.