Америка Қўшма Штатлари давлат котиби Майк Помпео мамлакатимизда диний эркинликка доир ҳолат ижобий томонга кескин ўзгарганини эътироф этиб, бу йўлда Ўзбекистон ҳукумати олиб бораётган саъй-ҳаракатларни олқишлади.

«Ўзбекистонда диний эркинлик билан боғлиқ вазиятни яхшилаш бўйича дадил қадамлар қўйилди, республиканинг бу борадаги амалий ишлари рўйхати кенгаймоқда ва айни йўналишдаги интилишлари давом этмоқда», – деди у АҚШ Давлат департаментига тақдим этилган ушбу мавзуга доир ҳисоботи муҳокамасига бағишланган матбуот анжуманида.

Помпеонинг айтишича, АҚШнинг диний эркинликлар бўйича йиллик ҳисоботида Ўзбекистонда 2019 йил давомида диний ташкилотларга қарши бирорта ҳам рейд ўтказилмагани эътироф этилган. Ваҳоланки, бундай ҳаракатлар 2018 йилда 114 та, 2017 йилда эса 240 тани ташкил этган. У шунингдек, жорий йил бошида мамлакатимизга қилган ташрифи чоғида диний арбоблар билан учрашиб, мулоқотлар ўтказганини ҳам таъкидлаган.