Тошкент, Ўзбекистон (UzDaily.uz) -- АҚШ давлат котибининг сиёсий масалалар бўйича ўринбосари Томас Шэннон 24-29-октябрь кунлари Қозоғистон, Қирғизистон ва Ўзбекистонга ташриф буюради. Бу унинг Марказий Осиёга илк ташрифидир. Давлат котиби ўринбосари ҳар бир мамлакат мустақиллигининг 25 йиллигини нишонлайди ҳамда умумий манфаатли масалалар бўйича суҳбатлашиш ва муштарак минтақавий фаолият учун минбар саналган “С5+1” ташаббуси доирасида АҚШ ва Марказий Осиё давлатлари ўртасидаги кучли ва ўсиб бораётган ҳамкорликка алоҳида эътибор қаратади.

24-октябрь куни давлат котиби ўринбосари Шэннон Қозоғистон пойтахти Остонага бориб, ҳукумат мулозимлари ва АҚШ алмашув дастурлари битирувчилари билан учрашади. Шунингдек, у “2017 йил ЭКСПО” маркази ва Қозоғистон Миллий музейига ташриф буюради. 26-27-октябрь кунлари Қирғизистон пойтахти Бишкекда у мулозимлар, парламент аъзолари ва фуқаролик жамияти вакиллари билан учрашади. Жаноб Шэннон Марказий Осиёдаги Америка университетида нутқ сўзлайди, университетнинг “С5+1” Ёшлар кенгаши аъзолари билан кўришади ҳамда “Уркун” ёдгорлигини бориб кўради. Сўнгра, Давлат котиби ёрдамчиси Шэннон Ўзбекистоннинг Тошкент ва Самарқанд шаҳарларига ташриф буюриб, юқори лавозимли расмийлар, ишбилармон доиралар ва фуқаролик жамияти вкиллари билан учрашади, Шунингдек, у қатор маданий мерос обидалари, жумладан Регистонни ҳамда биринчи Президент Ислом Каримов қабрини зиёрат қилади.

Давлат котиби ўринбосари Шэннон сафари натижасида Қўшма Штатлар Марказий Осиё ҳукуматлари ва халқлари билан ўзаро алоқаларни янада мустаҳкамлашга умид билдиради.