Тошкент, Ўзбекистон (UzDaily.uz) — 2025 йил 15 март куни Тошкент вақти билан соат 10:30 да Андижон халқаро аэропорти “Uzbekistan Airways” авиакомпаниясининг Тошкент-Андижон йўналиши бўйича биринчи техник рейсини қабул қилди.

Аэропортда реконструкциянинг биринчи босқичи якунланди, унинг доирасида аэродром мажмуасининг салмоқли қисми, жумладан, узунлиги 3300 метр ва эни 60 метр бўлган янги 4E тоифали учиш-қўниш йўлаги, битта юриш йўлаги ва 3 та самолёт тўхташ жойига эга перрон қурилиши якунланди.

Таъкидлаш жоиз, Андижонда аэродром қопламасининг янги элементлари (учиш-қўниш йўлаги, юриш йўлаги ва перрон) бетондан қурилган. Қопламанинг юк кўтариш қобилиятини аниқловчи тасниф рақами - PCN - 64R/B/W/T. Бу аэропортга Боэинг 787, 747, Airbus A330 каби кенг фюзеляжли самолётлар ва қуйи тоифадаги самолётларни чекловларсиз қабул қилиш имконини беради. Кучлироқ ва бардошлироқ бўлган бетон учиш-қўниш йўлаклари иссиқ иқлим шароитида оптимал ечимдир. Бугунги кунга қадар Навоий ва Термиз аэропортларида ҳам бетон учиш-қўниш йўлаклари қурилган.

Шунингдек, аэродромда иккинчи юриш йўлаги ва 7 та самолётлар тўхташ жойига эга перрон қурилиши давом эттирилиб, , ICAO CAT-II тоифасидаги радар, метеорологик ва ёритиш ускуналарини ўрнатиш бўйича қурилиш-монтаж ишлари олиб борилмоқда. Бу бир вақтнинг ўзида 10 тагача самолётга перронда хизмат кўрсатиш ва тунги вақтда ҳамда ноқулай об-ҳаво шароитида самолётларни қабул қилиш имконини беради. Бу, ўз навбатида, Андижон шаҳри ва Фарғона водийсига қатновлар сонини ва йўловчилар оқимини кўпайтириш имконини беради.

Андижон аэропорти аэродром мажмуасини тўлиқ реконструкция ва модернизация қилиш муносабати билан 2023 йил 1 апрель куни ёпилган эди. Аэродром қопламасининг элементлари - узунлиги 2985 метр ва кенглиги 44 метр бўлган учиш-қўниш йўлаги, юриш йўлаги ва перрони узоқ хизмат муддати ва паст юк кўтариш қобилияти туфайли реконструкция қилиниши талаб этилган ва кўплаб турдаги самолётларни қабул қилишда, шунингдек, замонавий ёритиш тизимининг йўқлиги сабабли тунги вақтда рейсларни қабул қилишда чекловлар мавжуд эди.

Андижон халқаро аэропорти тез орада мунтазам йўловчи рейсларини қабул қила бошлайди.