Тошкент, Ўзбекистон (UzDaily.uz) — Давлатимиз раҳбарининг Малайзияга расмий ташрифи кўплаб ҳамкорлик шартномалари имзоланиши ва келишувларга эришилишига сабаб бўлди.

Расмий ташриф доирасида ўтказилган Ўзбекистон-Малайзия бизнес форумида мамлакатимиз экспорт ҳажмини ошириш бўйича яна бир шартнома имзоланди.

Ўзбекистоннинг "Akfa Extrusions" ва Малайзиянинг "United Hydraulic" компаниялари ўртасида имзоланган шартномага кўра, Малайзияга алюминдан тайёрланган бутловчи қисмлар етказиб берилади.

Илк бора Малайзияга экспорт қилиниши кутилаётган ушбу маҳсулотларнинг бошланғич шартномавий қиймати $ 10 млн долларни ташкил қилади.

Бу каби бутловчи қисмлар электротехника, автомобилсозлик саноатида, қуёш электр тизимларида кенг қўлланилади.

Маҳаллий маҳсулотларимизнинг халқаро майдондаги рақобатбардошлигини ошириш, экспорт қилиш бўйича яратилган имкониятлардан унумли фойдаланиш бу каби шартномалар тузилишига сабаб бўлмоқда.

Электротехника саноатида бу каби натижалар миқдори маҳсулотлар сифатини ошириш, таннархни тушириш ва давлатимиз томонидан яратилган имкониятлардан кенг фойдаланиш орқали янада оширилади.