Президент Халқ қабулхоналари Фарғона ва Қўқон шаҳарлари, Тошлоқ, Қўштепа, Риштон, Ўзбекистон туманларида суд-ҳуқуқ соҳаси бўйича ташкил қилган оммавий қабулларда вилоятнинг барча ҳудудидаги мурожаатчилар қамраб олинди. Ҳар бир ариза ва шикоят ҳудудлардаги масъул раҳбарлар ва мурожаатчилар иштирокида синчиклаб кўриб чиқилди. Қонуний ечими бор масалалар жойида ҳал қилиб берилди.

Бир мисол – данғаралик Мухтасархон Ҳожиматовага 2019 йили имтиёзли кредит асосида намунавий лойиҳалар асосида курилган уй-жой ажратиш белгиланган. Бошланғич тўлов учун кредитнинг 10 фоизи давлатимиз томонидан тўлаб ҳам берилган. Аммо қурилиш ишлари чўзилиб, уйларни фойдаланишга топшириш ишлари кечиккан. Яқинда унга банк кредит ажратар экан, янги тартибга кўра бошланғич тўлов учун яна қўшимча 5 фоиз маблағ тўлаши кераклиги айтилади. Ўртада банк ходимлари билан тушунмовчилик келиб чиқади. Мухтасархон Ҳожиматованинг оммавий қабулдаги мурожаатидан сўнг бу масала ҳал қилинди, уларга ипотека кредити бошланғич тўлов тўланган давр – 2019 йилги тартиб бўйича расмийлаштириладиган бўлди. Бу мурожаат асосида данғаралик яна 9 киши – жами 10 нафар фуқаронинг худди шу масаладаги муаммоси ҳал қилиб берилди.

Шу каби мулоқотлар натижасида яқинда Қувасой шаҳридаги кар-соқовлар махсус мактаб интернатидан ноқонуний ишдан бўшатилган  Гулноза Тугалбоева ва Муяссар Ёрмаматованинг ҳуқуқлари ҳимоя қилиниб, улар ўзлари ишлаган муассасадаги ўз вазифасига ишга тикланди.

Тўрт кунлик қабулларда Олий суд ва Судьялар олий кенгаши масъуллари 933 та масалани кўриб чиқди. Мулоқотлар натижасида 7 нафар шахс суд залидан, 193 нафар шахс жазони ўташдан муддатидан олдин озод қилинди.

Шунингдек, сайёр суд мажлисларида 166 нафар шахсга нисбатан қўзғатилган маъмурий жавобгарлик тўғрисидаги ишлар ҳам атрофлича кўрилиб, уларнинг аризалари қаноатлантирилди. Битта шикоят бўйича суд қарори ижроси тўхтатилди. Қўқонлик Матлуба Исоқова 3 фарзанднинг онаси. Боқувчиси йўқ. “Темир дафтар”га киритилган. Ўғли Неъматжон яқинда тоғасининг автомашинасини ҳайдаб кўчага чиқади ва йўл ҳаракати қоидаларини бузади. Автомобиль жарима майдонига олиб кирилади. Бу аёл оммавий қабулда ўғли хатоси учун тўғри жазоланганини, бироқ жаримани тўлашга имкони йўқлигини айтиб, масъуллардан енгиллик сўради. Вилоят суди ва Қўқон шаҳар ички ишлар бошқармаси масъуллари бу мурожаат асосида маъмурий ишни тезкор, аммо батафсил кўриб чиқди. Онанинг ижтимоий аҳволи, ўғлининг пушаймонлиги ҳисобга олиниб, айбдорга енгиллик берилди.

Фуқаролик ишлари бўйича судлар кўриб чиққан мурожаатлар асосида алимент бўйича 74 та, иш ҳақи ундириш юзасидан 2 та суд буйруқлари чиқарилиб, ижрога қаратилди. Юридик аҳамиятга эга фактларни белгилашга оид 13 та ариза қаноатлантирилди. Тарафлар ярашганлиги ва даъвогар даъвосидан воз кечгани сабабли умумий мулкни бўлиш, таъминот ундириш ҳақидаги иккита иш юритишдан тугатилди. Битта иқтисодий иш бўйича тарафлар яраштирилиб, келишув битими тасдиқланди. Келишмовчиликлар боис  анчадан бери Ҳасановлар оиласининг ҳам тинчи бузилган, оила ажрашиш ёқасига келиб қолган эди. Оммавий қабулга ажрашиш ниятида келган бу оила билан суҳбатлашилгач, улар яраштирилди. Бир оила сақлаб қолинди.

Тўрт кун ичида 183 та мурожаат бўйича аризалар Олий суд томонидан кассация тартибида хал қилиш учун қабул қилиниб, тегишли судлов ҳайъатига кўриб чиқиш учун ўтказилди. Яъни 183 нафар мурожаатчи ўз аризасини Олий судга тақдим қилиш учун пойтахтга келиб-кетиш ўрнига шу ернинг ўзида Олий суд масъулларига бевосита тақдим қилиш, бу борадаги барча саволига жавоб олиш имконига эга бўлди.

Бош прокуратура мутасаддилари 528 та масаланинг 82 тасига жойида ечим топди. Мисол учун Муқаддасхон Умарова 2013 йилда банкка маблағ қўяди. Орадан 6 йил ўтиб – 2019 йилда омонатга қўйган маблағини фоизлари билан қайтариб олади. Аммо 2020 йилда, банкдагилар, негадир ўзлари тўлаган фоизни ортиқча тўланган деб топиб, онахоннинг пенсиясидан ҳар ой маблағ ушлаб қола бошлайди. Айни шу масаладаги саволларига жавоб излаб келган Муқаддасхон аянинг масаласи ҳам ўрганиб чиқилиб, қонуний-адолатли ҳал қилиб бериладиган бўлди.

Ички ишлар вазирлиги масъуллари жазодан озод қилиш, суриштирув ва тергов, ички ишлар органларига ишга тикланиш, ишга кириш, фуқаролик, паспорт-виза, йўл ҳаракати хавфсизлигини таъминлаш ва бошқа масалаларга оид 264 та мурожаатни кўриб чиқди. Уларнинг 112 таси жойида ҳал қилинди. Хусусан, 95 нафар шахсларни муддатидан олдин шартли равишда жазодан озод қилиш бўйича судларга тақдимномалар киритилиб, улар жазодан озод этилди. Хусусан, риштонлик Ғолибжон Йўлдошев ўтган йили автомобилни нотўғри бошқариб, йўл-транспорт ҳодисаси содир қилади. Ўзининг ҳам, ўзганинг ҳам автомобили жиддий зарар кўради. Оиласи барча зарарни қоплаб бергач, Ғолибжонга 2 йилдан ортиқ муддатга озодликни чеклаш жазоси белгиланади. Жазонинг ярмини ўтаган Ғолибжон Йўлдошевнинг мурожаатидан сўнг унинг қилмишидан тўғри хулоса чиқаргани, қатъий тузалиш йўлига ўтиб, жазони ўташ учун ўрнатилган тартиб-қоидаларга риоя этгани, ҳалол меҳнат қилаётгани учун ички ишлар органлари тақдимномаси асосида ўталмай қолган 1 йил 2 ой озодликни чеклаш жазосидан шартли равишда озод этилди.

Ўзбекистонлик Илтимосхон Учқунова эса 2020 йили 5 та тикув машинаси олиб келинлари билан оилавий тадбиркорликни йўлга қўяди. Ишлари юришиб, улар тиккан маҳсулотларнинг бозори чаққон бўла бошлайди. Бироқ ўтган йили унинг бир маҳалладоши 21,4 миллион сўмлик товарини сотиб беришини айтиб олиб кетади-ю, унга 3 миллион сўм тўлайди, холос. Аёл ички ишлар органига мурожаат қилгач, яна 8 миллион сўми олиб берилади, бироқ қолган сумма ҳали ҳам қайтарилмаган. Илтимосхон опанинг   вазирлик масъулларига мурожаатидан сўнг қўшимча тергов-суриштирув жараёнида барча масалага ойдинлик киритилиб, бу масала ҳал қилиб бериладиган бўлди.

Қўқонлик Бахтиёр Бурҳонов 2020 йил 29 ноябрь куни уч номаълум шахс маст ҳолатда унинг уйига кириб, уни ҳақорат қилгани ва  саломатлигига зиён етказганига қарамай, зўровонларга ҳеч қандай чора кўрилмаётганидан арз қилди. Вазирлик масъуллари мазкур ҳолат бўйича адолатли-холис тергов ўтказилишини ўз назоратига олди.

Оммавий қабуллар давомида барча соҳа мутасаддиларининг биргаликдаги саъй-ҳаракатлари натижасида 57 нафар мурожаатчи ишга жойлаштирилди, 25 кишига имтиёзли кредит, 45 нафар ёшларга ер майдони ажратилди. Ижтимоий ҳимояга муҳтож 14 нафар хотин-қизга тикув машинкаси, уй-рўзғор буюмлари, 4 та оилага уй-жойини таъмирлаши учун қурилиш материаллари олиб берилди Соғлиғини тиклаш масаласида мурожаат қилганларнинг 12 нафарига бепул даволаниш учун йўлланма, 24 нафарига ногиронлик аравачаси, ортопедия буюмлари ва реабилатация воситалари берилди.

Умумлаштириб айтганда, Фарғона вилоятида ўтказилган оммавий қабулларда 2 минг 188 нафар мурожаатчининг 2 минг 217 та масаласи кўриб чиқилди. Уларнинг 708 таси жойида ҳал этилди, 538 та мурожаат бўйича ҳуқуқий маслаҳат ва тушунтиришлар берилди, қўшимча ўрганиш талаб этиладиган 971 та масала бўйича аниқ муддат ва масъуллар белгиланиб, Президент Халқ қабулхоналари томонидан назоратга олинди.