Тошкент, Ўзбекистон (UzDaily.uz) — Ўзбекистон миллий терма жамоаси ўйинчиси Абдукадир Хусановнинг укаси Абдураҳим Хусанов Франциянинг «Ланс» клуби академиясида машғулот ўтказмоқда. Бу ҳақда Championat.asia нашри ходими Толибжон Қосимов маълум қилди.

Қосимовнинг маълумотларига кўра, Абдукадир Хусановнинг агентлари ва «Ланс» клуби раҳбарияти ўртасида ҳамкорликни ривожлантириш бўйича келишувга эришилган.

Келишув доирасида ўзбек футболининг истиқболли ёш истеъдодлари Франция клуби академиясига юборилади. Абдураҳим Хусанов ушбу дастурнинг илк иштирокчиси бўлди.

Ёш ҳужумчи академияда муайян вақт давомида тажрибали мураббийлар раҳбарлигида ўз маҳоратларини оширади.

Бу ҳамкорлик ўзбек футболчилари учун янги истиқболларни очади. Европанинг нуфузли клуби «Ланс» билан ишлаш уларнинг ривожланишига ва Ўзбекистон футболининг умумий даражасини кўтаришга ёрдам беради.

«Ланс» академиясида муваффақиятли ўқиш Абдураҳим Хусановнинг профессионал карьерасида ва Ўзбекистоннинг бошқа истеъдодли футболчилари учун муҳим қадам бўлиши мумкин. Ҳозирча Абдураҳим академияда қанча вақт ўтказиши номаълум.

Эслатиб ўтамиз, унинг акаси Абдукадир Хусанов ҳозирда «Ланс» клуби ҳимоячиси ҳисобланади ва «Манчестер Сити»га ўтиш арафасида турибди. Клублар унинг трансфери бўйича 40 миллион евро миқдорида келишувга эришишган, бонуслар билан сумма 50 миллион еврогача ошиши мумкин.