Ташкент, Узбекистан (UzDaily.uz) - 18-20 апрел кунлари Тошкент шаҳрида (Ўзбекистон) Халқаро пенсия ва ижтимоий фондлар ассоциацияси ва Ўзбекистон Республикаси бюджетдан ташқари Пенсия жамғармаси томонидан ташкил этилган "Ўзбекистонда ва Евросиёда пенсия ислоҳоти. Муаммолар ва ечимлар" мавзусида Халқаро конференсия бўлиб ўтяпди. Бу мамлакатимизда бўлиб ўтган биринчи шу турдаги форумдир.

Конференсияда Арманистон, Беларус, Грузия, Қозоғистон, Қирғизистон, Молдова, Тожикистон давлатларининг пенсия ва ижтимоий фонд ҳамда муассасаларининг раҳбарлари, шунингдек “Газфонд” нодавлат Пенсия жамғармаси вакиллари иштирок этди.

Тадбирнинг кириш қисмида Халқаро пенсия ва ижтимоий фондлар ассоциацияси директори Э. Аметов, Ўзбекистон Республикаси Молия вазирининг ўринбосари Й. Турсунов ва Ўзбекистон Республикаси Меҳнат ва бандлик муносабатлари вазирининг биринчи ўринбосари Э. Мухитдинов сўзга чиқишди.

Қозоғистон, Қирғизистон, Молдова ва Озарбайжон давлатлари делегацияларининг вакиллари ушбу мамлакатларнинг пенсия тизимлари, уларнинг ўхшашликлари ва фарқлари ҳақида маълумот беришди.

Ўзбекистон Республикаси Пенсия жамғармаси мутахассислари мамлакатимизда пенсия ислоҳотлари консепсияси ҳақида маълумот бердилар.

Бутунроссия меҳнат илмий-тадқиқот институтининг бош илмий ходими, иқтисод фанлари доктори Валентин Роикнинг "Собиқ Совет Иттифоқи давлатларида пенсия ислоҳотлари: натижалар, ҳал қилинмаган муаммолар, янги қийинчиликлар ва уларга жавоблар" мавзусидаги маърузаси алоҳида қизиқиш уйғотди.

У 90-йилларнинг бошида ижтимоий-сиёсий моделдаги ўзгаришларни, кейинчалик “шок терапияси” ва унинг пенсионерларга таъсири, ўтган вақт мобайнида МДҲ давлатларининг пенсия тизимларини модернизация қилиш натижалари, уларнинг давлатини институционал позициядан ва аҳоли кексайишининг барқарор ривожланиш тенденсияси доирасида юзага келган муаммоларни тасвирлаб берди.

Иштирокчилар пенсия тизимларини ислоҳ қилиш ва ижтимоий суғурта масалалари, шу жумладан пенсия ёшидаги ўзгаришларни муҳокама этдилар. Хусусан, Ўзбекистонда пенсия ёши эркаклар учун 60 ёш, аёллар учун эса 55 ёш, деб белгиланган. Туркманистонда мос равишда 62 ва 57 ёш, Қозоғистон, Қирғизистон ва Тожикистонда – 63 ва 58 ёш, бундан ташқари, Қозоғистонда аёлларнинг пенсия ёшини аста-секин ошириб, 63 йилга етказиш тўғрисида қарор қабул қилинган.

Шу билан бирга, делегатлар Ўзбекистон Республикаси Вазирлар Маҳкамасининг 2019 йил 18 мартдаги “Ногиронлиги бўлган фарзандларнинг оналарини ижтимоий қўллаб-қувватлаш ҳамда ижтимоий аҳамиятли товарларни (хизматларни) эркин нархларда сотилишини таъминлашга йўналтирилган ўзгартириш ва қўшимчалар киритиш тўғрисида”ги қарорига мувофиқ ногирон болаларни тарбиялаётган оналарга ижтимоий нафақалар тўлаш тартиби билан танишдилар.

Мазкур қарорга кўра ушбу аёллар 55 ёшга тўлганидан сўнг, зарур иш тажрибасига эга бўлмаса ҳам, ойлик нафақа олиш ҳуқуқига эгалиги кўрсатиб ўтилган. Бугунги кунда мазкур масала бўйича Пенсия жамғармасига 1000 нафарга яқин оналар мурожаат қилишган.

Шунингдек, анжуман иштирокчилари томонидан Евроосиё давлатларининг пенсия тизимлари ўргамилди ҳамда соҳани ривожлантиришнинг кейинги йўналишларини муҳокама этилди.

Манба: Молия вазирлигининг телеграм канали.