Тошкент, Ўзбекистон (UzDaily.uz) — 2025 йилда Тошкент шаҳридаги «Пахтакор» стадионини реконструкция қилиш ишлари бошланиши режалаштирилган. Бу ҳақда футбол клубининг раиси Жаҳонгир Ортиқхўжаев маълум қилди.

Унинг сўзларига кўра, ишлар якунланганидан сўнг стадион тўлиқ Халқаро футбол федерацияси (ФИФА) талабларига мос келадиган даражага келтирилади.

«Пахтакор» стадиони 1954–1956 йилларда меъмор Митхат Сагатдинович Булатов раҳбарлигида қурилган. Дастлаб стадионнинг сиғими 55 минг томошабинни ташкил қилган эди. Бироқ, 1996, 2008 ва 2012 йиллардаги реконструкция ишларидан сўнг, унинг сиғими 35 минг ўринга қисқартирилган.

Янги реконструкция жараёни стадион инфратузилмасини замонавийлаштириш, мухлислар учун қулайликларни ошириш ҳамда халқаро стандартларга мослаштиришни мақсад қилган бўлиб, у юқори даражадаги ўйинларни ўтказишга имконият яратади.