Тошкент, Ўзбекистон (UzDaily.uz) — 2024 йилда Ўзбекистон аҳолиси тез ёрдам хизматига 13,5 миллион марта мурожаат қилди, бу ўтган йилга нисбатан деярли ўзгармаган, деб хабар бермоқда Ўзбекистон Республикаси Соғлиқни сақлаш вазирлиги.

Жами чақириқларнинг 9,7 миллионтаси шошилинч ҳолатларга, 3,4 миллионтаси сурункали касалликларга чалинган беморларга, 91 мингтаси эса туғруқ билан боғлиқ ҳолатларга тўғри келди.

Тез тиббий ёрдамга мурожаатлар сони бўйича Фарғона вилояти етакчи бўлиб, 1,4 миллион чақириқ қайд этилди. Иккинчи ва учинчи ўринларни эса Тошкент ҳамда Андижон вилояти эгаллади. Бу учта ҳудуд йил давомида тез ёрдам чақириқлари сони бўйича етакчилик мавқеини сақлаб қолди.

Энг кам шошилинч тиббий ёрдам чақириқлари Навоий (402 минг), Сирдарё (454 минг) ва Жиззах (548 минг) вилоятларида қайд этилди.