Toshkent, O‘zbekiston (UzDaily.uz) — Rossiya Tashqi ishlar vazirligining rasmiy vakili Mariya Zaxarova TASS axborot agentligiga bergan izohida, Moskvadagi O‘zbekiston elchixonasi tomonidan yuborilgan nota mazmuni Rossiya tomonidan diqqat bilan o‘rganilayotganini maʼlum qildi.

Uning so‘zlariga ko‘ra, o‘zbek tomoni yo‘llagan rasmiy murojaat tegishli idoralarga yetkazilgan va tekshirilgan, xolis maʼlumotlar belgilangan tartibda o‘zbek hamkorlariga taqdim etiladi.

Avvalroq O‘zbekiston Tashqi ishlar vazirligi matbuot kotibi Ahror Burxonov Rossiya hududida o‘zbekistonlik fuqarolarga nisbatan tintuvlar o‘tkazilishi va ehtimoliy noqonuniy muomalalar yuzasidan Toshkentda jiddiy xavotir paydo bo‘lganini maʼlum qilgan edi. Shu munosabat bilan O‘zbekiston elchixonasi Rossiya tomoniga rasmiy nota yuborib, tushuntirish so‘ragan.

«Nota qabul qilinganidan so‘ng, unda bayon etilgan maʼlumotlar atroflicha o‘rganilmoqda. Mamlakatlarimiz o‘rtasida huquqni muhofaza qiluvchi va boshqa vakolatli idoralar o‘rtasida to‘g‘ridan-to‘g‘ri aloqa kanallari mavjud. Ittifoqdoshlar o‘rtasida bu kabi masalalar ochiqcha muhokama qilinadi, har bir signal sinchiklab ko‘rib chiqiladi. O‘zbek tomonining murojaati tegishli organlarga yuborilgan, to‘plangan obyektiv maʼlumotlar o‘z vaqtida Toshkentga yetkaziladi», — dedi Zaxarova.

Shuningdek, u Rossiya va O‘zbekiston o‘rtasida mustahkam ittifoqchilik va har tomonlama strategik sheriklik mavjudligini taʼkidlab, Moskva ikki tomonlama kun tartibidagi masalalarga aynan shu nuqtai nazardan yondashishini qo‘shimcha qildi.