Toshkent, O‘zbekiston (UzDaily.uz) — 2024 yil yakunlari bo‘yicha O‘zbekiston Respublikasi tovar-xom ashyo birjasida (UZEX) tuzilgan bitimlar umumiy hajmi 2023 yilga nisbatan 11,8% ga oshdi.

Jumladan, birja savdolari hajmi 14,8% ga o‘sgan bo‘lsa, elektron davlat xaridlari ko‘rsatkichlari 5,3% ga ko‘paydi.

Avtomobil raqamlari onlayn-auksionlari hajmi ikki barobarga oshdi, mobil raqamlar savdosi esa 43,6% ga o‘sdi.

Xarid.uzex.uz platformasida o‘tkazilgan elektron davlat xaridlari orqali byudjet va korporativ mablag‘lardan 7,9 trln so‘m tejaldi.

Onlayn-auksionlar uchun avtoraqam.uzex.uz platformasida faollik sezilarli darajada oshdi. 195 mingdan ortiq avtomobil raqamlari sotildi, ularning 97% ni jismoniy shaxslar xarid qilgan bo‘lsa, 3% yuridik shaxslarga to‘g‘ri keldi. Eng arzon raqam 1,7 mln so‘mga sotilgan bo‘lsa, eng qimmat raqam 965,3 mln so‘mni tashkil qildi.

2024 yilda birja orqali 64,3 mingdan ortiq “yashil sertifikat” sotildi, umumiy qiymati 875,9 mln so‘m bo‘ldi. Bir sertifikatning o‘rtacha narxi 13,6 ming so‘mni tashkil qildi.

Birja savdolarida fermer xo‘jaliklari faol ishtirok etdi. Ulardan qariyb 30 ming fermer xo‘jaligi birja tizimi orqali birinchi marta 2,5 mln tonna paxta-xom ashyoni fyuchers va spot shartnomalari asosida sotdi.

Bundan tashqari, birja vositasida 2024 yil hosilidan 1,2 mln tonna g‘alla savdoga chiqarildi. Ushbu g‘alla avval vaqtinchalik omborlarda saqlangan edi.