Toshkent, O‘zbekiston (UzDaily.uz) — Turkiyadan Toshkentga Anqara reysi orqali uchgan fuqaro bortida vaʼda qilingan glyutensiz ovqat mavjud emasligi yuzasidan shikoyat qildi, deya xabar bermoqda Isteʼmolchilar huquqlarini himoya qilish qo‘mitasi matbuot xizmati.

Qo‘mita maʼlumotiga ko‘ra, yo‘lovchi chipta sotib olish vaqtida sog‘ligi haqida oldindan aviakompaniyani xabardor qilgan va maxsus ovqat taqdim etilishi tasdiqlangan. Biroq, uchish kuni bu majburiyat bajarilmagan.

Shuningdek, yo‘lovchi samolyot salonining sanitariya-gigiyena holatidan ham norozi bo‘lgan — uning o‘rnida oldingi parvozdan qolgan chiqindilar topilgan.

Xizmat tekshiruvi natijasida Uzbekistan Airways o‘z xatolarini tan oldi. Maʼlum bo‘lishicha, Anqara aeroportining keytering xizmati maxsus ovqatni yuklamagan.

Keltirilgan maʼnaviy va moddiy zarar uchun aviakompaniya yo‘lovchiga keyingi parvozda biznes-klassga ko‘tarilish (apgreyd) taklif qildi. Shuningdek, saloon tozaligi va xizmat standartlariga rioya etilishini nazorat qilishni kuchaytirish bo‘yicha topshiriq berildi.