Toshkent, O‘zbekiston (UzDaily.uz) — Gruziyaning Tbilisi shahrida dzyudo boʻyicha “Katta dubulgʻa” turniri oʻz yakuniga yetdi. Quvonarlisi, -90 kg vazn toifasida kechgan bahslarda hamyurtimiz Umar Bozorov oltin medalni qoʻlga kiritdi.

Olimpiada va jahon chempionati sovrindorlari jam boʻlgan mazkur vaznda yosh umidli polvonlarimizdan biri oʻzining ajoyib ishtiroki bilan yaqqol ajralib turdi. Bozorov finalda fransiyalik Aleksis Metyudan ustun keldi. 

Shu tariqa, Oʻzbekiston terma jamoasi mazkur musobaqani 1 ta oltin va 2 ta bronza medallari bilan yakunladi. Eslatib oʻtamiz, dastlabki kun bahslarida -66 kg vazn toifasidagi vakillarimiz Azizbek Ortiqov hamda Abdurahim Nutfullayev bronza medallari bilan taqdirlanishgan edi.