Toshkent, O‘zbekiston (UzDaily.uz) — 2025 yil 15 avgust kuni AQSH prezidenti Donald Tramp va Rossiya prezidenti Vladimir Putin o‘rtasida sammit bo‘lib o‘tdi. Uchrashuv Alyaska shtati, Ankoridj shahridagi “Elmendorf-Richardson” qo‘shma harbiy bazasida o‘tkazildi va so‘nggi to‘rt yil ichida ikki mamlakat rahbarlarining ilk shaxsiy muloqoti bo‘ldi.

Muzokaralarning asosiy mavzusi Ukrainadagi urushni to‘xtatish yo‘llarini izlashdan iborat bo‘ldi.

Sammit o‘tkazish joyi sifatida Alyaskaning tanlanishi ramziy ahamiyatga ega: uning Rossiyaga geografik yaqinligi va tarixiy o‘tmishida Rossiya hududi bo‘lgani ikki tomonlama munosabatlarning ahamiyatini taʼkidladi.

Prezidentlar uchrashuvi harbiy texnika, jumladan F-22 istrebitellari fonida bo‘lib o‘tdi, bu esa tadbirning jiddiyligini yana-da ko‘rsatdi.

Biroq rasmiy muhitga qaramasdan, uchrashuv aniq kelishuvlarga olib kelmadi.

Muzokaralar 3 soat davom etdi va yopiq formatda o‘tdi, shundan so‘ng qo‘shma matbuot anjumani tashkil etildi.

Tramp zudlik bilan o‘t ochishni to‘xtatish zarurligini taʼkidlab, «hech bo‘lmaganda qisman kelishuvga erishilmasa, men o‘zimni qoniqarli his qilmayman», dedi.

U shuningdek, Ukraina uchun xavfsizlik kafolatlari Yevropa ittifoqchilari bilan hamkorlikda ko‘rib chiqilishi mumkinligini, ammo NATO doirasida emasligini ishora qildi.

Putin esa “bu borada ishlashga tayyorligini” bildirib, Ukrainada tinchlikka erishish maqsadiga yaqinlashtiradigan o‘zaro tushunishga umid bildirdi. Biroq taraflar mojaroni to‘xtatish bo‘yicha aniq taklif yoki yo‘nalishlarni taqdim etmadi.

AQSH prezidenti Donald Tramp Ankoridjda Vladimir Putin bilan samarali muloqot o‘tkazganini va shuningdek, Vladimir Zelenskiy bilan telefon orqali suhbatlashganini maʼlum qildi.

“Alyaskada ajoyib va juda samarali kun! Rossiya prezidenti Vladimir Putin bilan uchrashuv juda yaxshi o‘tdi”, — deb yozdi u Truth Social ijtimoiy tarmog‘ida.

Oq uy rahbarining so‘zlariga ko‘ra, Putin bilan uchrashuvdan so‘ng u Zelenskiy va Yevropa yetakchilari bilan vaziyatni muhokama qilgan va barcha tomonlar Ukrainadagi mojaroni tugatishning eng to‘g‘ri yo‘li vaqtinchalik otashkesim emas, balki to‘liq tinchlik kelishuviga erishish ekani bo‘yicha umumiy fikrga kelgan. Tramp shuningdek, dunyo hamjamiyati eʼtiborini Ukraina masalasiga qaratgan holda, Zelenskiyni dushanba kuni Oval kabinetda qabul qilishini bildirdi.

Oq uy rahbari keyingi uchrashuv Moskvada bo‘lib o‘tishi mumkinligini ham istisno etmadi.

Ukraina prezidenti Vladimir Zelenskiy Tramp va Putin bilan tinchlik kelishuvini muhokama qilish uchun uchrashishga tayyorligini bildirdi, ammo tinchlik adolatli bo‘lishi va Ukraina hududiy yaxlitligiga tajovuz qilmasligi shartligini taʼkidladi.

Shu bilan birga, Ankoridjda Ukraina qo‘llab-quvvatlovchilari tomonidan mitinglar o‘tkazildi. Ular Rossiya tajovuzini to‘xtatish va Ukraina suverenitetini himoya qilishga chaqirishdi.

Alyaskadagi sammit AQSH va Rossiya o‘rtasida muloqot yo‘lga qo‘yishga urinishda muhim qadam bo‘ldi, biroq Ukraina mojarosini hal etishda aniq natijalarga olib kelmadi.

Ukraina xavfsizligi, hududiy yaxlitlik va harbiy jinoyatlar uchun javobgarlik masalalari tinchlikka erishish yo‘lidagi asosiy to‘siq bo‘lib qolmoqda.

Kelgusidagi muzokaralar taraflarning muvozanatli yondashuvga tayyorligi va deeskalatsiyaga qaratilgan amaliy qadamlariga bog‘liq bo‘ladi.