Toshkent, O‘zbekiston (UzDaily.uz) —  2025-yil 3-iyul kuni O‘zbekiston investitsiyalar, sanoat va savdo vaziri o‘rinbosari Akram Aliyev Toshkentda Yevropa kompaniyalari vakillari bilan muzokaralar o‘tkazdi.

Sloveniyaning MSIN kompaniyasi hamkori Marko Mohar bilan bo‘lib o‘tgan uchrashuvda O‘zbekistonda o‘zaro manfaatli hamkorlik va qo‘shma investitsiyaviy loyihalarni amalga oshirish istiqbollari muhokama qilindi.

MSIN d.o.o. — Sloveniya xususiy investitsiya va konsalting kompaniyasi. Kompaniya faoliyati asosan korporativ qayta tuzilish, greenfield investitsiyalar va axborot-kommunikatsiya texnologiyalari, ko‘chmas mulk, energetika va sanoat ishlab chiqarishi sohalarida sanoatni konsolidatsiyalashga qaratilgan.

Shu kuni fransuz kompaniyasi Technip Energies vakili Gaetano Krischi bilan ham uchrashuv bo‘lib o‘tdi. Tomonlar barqaror texnologik yechimlarga urg‘u bergan holda qo‘shma loyihalarni amalga oshirish istiqbollarini muhokama qildilar.

Technip Energies — xalqaro injiniring kompaniyasi bo‘lib, energetika, neft-kimyo va infratuzilma sohalarida yirik loyihalarni loyihalash va amalga oshirishga ixtisoslashgan.

O‘tkazilgan muzokaralar yakunida loyiha ustida soha vazirliklari va investorlar ishtirokida ekspertlar darajasida ishlash davom ettirilishi bo‘yicha kelishuvga erishildi. Uzoq muddatli hamkorlikka ikki tomonlama qiziqish tasdiqlandi.