Toshkent, O‘zbekiston (UzDaily.uz) — O‘zbekiston poytaxtida Honor Uzbekistan kompaniyasi tomonidan Honor 400 seriyasi smartfonlarining rasmiy taqdimoti bo‘lib o‘tdi.

Tadbirda texnologik kompaniyalar vakillari, IT-mutaxassislar, jurnalistlar hamda mobil texnologiyalar sohasidagi so‘nggi tendensiyalarga qiziquvchi blogerlar ishtirok etdi.

Prezentatsiya davomida Honor 400 va Honor 400 Pro kabi asosiy modellar taqdim etildi. Ular kamera, ishlash tezligi va energiya samaradorligi kabi xususiyatlari bilan alohida eʼtiborni jalb etdi. Yangilangan dizayn, mahalliy isteʼmolchilarning afzal ko‘rishlarini hisobga olgan holda ishlab chiqilgani alohida taʼkidlandi.

Kompaniya vakillari smartfonlarning texnik imkoniyatlarini namoyish etishdi: kam yorug‘likdagi suratga olish, sunʼiy intellekt asosidagi funksiyalar, tez quvvatlash texnologiyalari va boshqa afzalliklar keng yoritildi. Shuningdek, respublika bo‘ylab rasmiy distributsiya va servis tarmog‘ini kengaytirish rejalari eʼlon qilindi.

Taqdimot chog‘ida HONOR Uzbekistan kompaniyasining bosh direktori Chen Long so‘zga chiqib, O‘zbekiston kompaniya uchun Markaziy Osiyodagi ustuvor bozorlardan biri ekanini qayd etdi. Uning taʼkidlashicha, yangi smartfonlar seriyasining taqdim etilishi brendning bozordagi mavqeini mustahkamlash va innovatsion yechimlarni arzon narxlarda taklif etishga intilishini anglatadi.

Tadbir smartfonlarning interaktiv namoyishi va mehmonlar o‘rtasida sovg‘alar o‘yini bilan yakunlandi.