Toshkent, O‘zbekiston (UzDaily.uz) — O‘zbekiston Respublikasi Raqobatni rivojlantirish va isteʼmolchilar huquqlarini himoya qilish qo‘mitasi 30 dan ortiq kompaniyani reklama qonunchiligini buzgani uchun javobgarlikka tortdi.

Joriy yilning yanvar va fevral oylarida qo‘mitaning Toshkent shahar hududiy boshqarmasi tomonidan reklama faoliyatining qonunchilik talablariga muvofiqligi bo‘yicha monitoring va tahlil ishlari olib borildi.

Tekshiruv davomida Hududiy boshqarmaning maxsus komissiyasi Toshkentda faoliyat yuritayotgan 30 dan ortiq xo‘jalik yurituvchi subyektlarda qonunbuzarliklarni aniqladi. Ular orasida Coca Cola Ichimligi Uzbekistan, International Beverages Tashkent (Pepsi), MAK Food Servis, LUMIERI, Turan Media, Oqtepa Food Service va BARATRUM (SAFIA) kabi kompaniyalar bor.

Ushbu kompaniyalarga nisbatan «Reklama to‘g‘risida»gi Qonun va Vazirlar Mahkamasining 104-sonli «Tashqi reklama bozorini tartibga solish to‘g‘risida»gi qarori bilan tasdiqlangan Tashqi reklama va maʼlumotlarni joylashtirish tartibi to‘g‘risidagi nizom talablarini buzgani uchun maʼmuriy ishlar qo‘zg‘atildi. Tekshiruv natijalariga ko‘ra, ushbu kompaniyalarga moliyaviy jarimalar qo‘llash haqida qaror qabul qilindi.

Bundan tashqari, mazkur kompaniyalarga aniqlangan qonunbuzarliklarni bartaraf etish va kelgusida bunday holatlarga yo‘l qo‘ymaslik bo‘yicha majburiy topshiriqlar berildi.