Toshkent, O‘zbekiston (UzDaily.uz) — Transport vazirligi TALIEV loyihasi ishtirokchilari bilan hamkorlikda ayollarni haydovchilik kasbiga jalb etish bo‘yicha ishlarni davom ettirmoqda.

"Toshshahartransxizmat" AJning ikki nafar xodimini o‘qitishdan boshlangan tashabbus a’lo natijalar ko‘rsatdi - bugungi kunda ular Toshkent shahri avtobus yo‘nalishlarida muvaffaqiyatli faoliyat yuritmoqda.

Bu yil loyiha kengaytirildi: 31 nomzoddan 23 nafar ayol tanlab olindi. Ular avtobus boshqarish huquqini beruvchi D toifali haydovchilik guvohnomasini olish uchun o‘qishni boshladilar. Darslar 260 soatlik nazariy va 224 soatlik amaliy mashg‘ulotlardan iborat.

Transport vazirligi jinsidan qat’i nazar, sohani rivojlantirish maqsadida yetuk mutaxassislar ishtirokini izchil kengaytirib, yangi imkoniyatlar va munosib ish o‘rinlariga yo‘l ochmoqda.