Toshkent, O‘zbekiston (UzDaily.uz) — Mamlakatning eng yirik raqamli banki boʻlgan TBC Bank, Shveytsariyaning impakt-investitsiyaga ixtisoslashtirilgan  BlueOrchard Finance Ltd (“BlueOrchard”) kompaniyasi boshqaruvidagi fonddan 20 million AQSh dollari miqdorida mablag‘ jalb qilganini e’lon qiladi.

Mazkur yangi bitim natijasida TBC Bankning BlueOrchard orqali jalb qilgan umumiy mablag‘ hajmi 45 million AQSh dollarga yetdi. Avvalgi moliyalashtirish shartnomasi 2024-yil avgust oyida tuzilgan bo‘lib, uning doirasida bank 25 million AQSh dollari miqdorida mablag‘ olgan edi.

Ajratilgan mablag‘lar kelgusida TBC Bank kredit portfelini kengaytirish va moliyaviy xizmatlarning mamlakat bo‘ylab yanada ommalashishiga yo‘naltiriladi, shu bilan birga, kichik va o‘rta biznes uchun maxsus moliyaviy mahsulotlar qatorini rivojlantirishga alohida e’tibor qaratiladi.

Nika Kurdiani, CEO TBC Uzbekistan: “Biz BlueOrchard bilan hamkorlikni yanada mustahkamlash va KO‘B segmentida kreditlashni yo‘lga qo‘yish arafasida qo‘shimcha mablag‘ jalb qilish imkoniyatini yuqori baholaymiz. Bu bizga moliyalashtirish manbalarini diversifikatsiya qilishda davom etish va O‘zbekistondagi kichik hamda o‘rta biznes subyektlariga o‘z faoliyatini kengaytirish va mamlakat iqtisodiyotining o‘sishini rag‘batlantirish uchun zarur bo‘lgan kreditlarni tez va qulay taqdim etish imkonini beradi”.

Filipp Myuller, CEO BlueOrchard: “TBC Bankning O‘zbekistonda moliyaviy xizmatlarning mavjudligini kengaytirish bo‘yicha missiyasi BlueOrchard kompaniyasining korporativ qadriyatlariga to‘liq mos keladi va biz hamkorligimizning rivojlanishidan mamnunmiz. Ishonchimiz komilki, ajratilgan qo‘shimcha mablag‘lar TBC Bank Uzbekistanga mintaqada kichik va o‘rta biznesning o‘sishi hamda rivojlanishini jadallashtirishga yordam beradi”.