Toshkent, O‘zbekiston (UzDaily.uz) — Joriy yilning 7-noyabr kuni Iqtisodiyot va moliya vazirligida Yaponiyaning “Sojitz Corporation” kompaniyasi vakillari bilan uchrashuv bo‘lib o‘tdi.

Uchrashuvda Yaqin Sharq va Afrika mintaqasidagi mintaqaviy bosh menejer Chizuo Vatanabe, Yaqin Sharq va Afrika mintaqasidagi infratuzilma bo‘limi menejeri o‘rinbosari Joyston Dalmeida va kompaniyaning boshqa vakillari ishtirok etdi. O‘zbekiston tomonidan Iqtisodiyot va moliya vazirligi Davlat-xususiy sheriklik loyihalarini amalga oshirish departamenti direktori Ilhomjon Umrzakov va boshqa mas’ul shaxslar ishtirok etdi.

Uchrashuv davomida O‘zbekistonda energetika, transport va suv infratuzilmasini modernizatsiya qilishga qaratilgan infratuzilma loyihalarini birgalikda amalga oshirish masalalariga alohida e’tibor qaratildi. Tomonlar ushbu sohalarda ilg‘or texnologiyalarni joriy etish yo‘llarini muhokama qildilar va DXSh asosida infratuzilma tashabbuslarini amalga oshirish uchun investitsiyalar jalb qilish istiqbollarini o‘rgandilar.

Uchrashuv yakunida tomonlar O‘zbekiston infratuzilmasining barqaror rivojlanishiga xizmat qiladigan DXSh asosidagi qo‘shma loyihalarni amalga oshirish bo‘yicha kelgusidagi hamkorlikka tayyorliklarini bildirdilar.

Sojitz Corporation — Yaponiyaning yirik savdo-investitsiya kompaniyasi bo‘lib, dunyoning 50 dan ortiq mamlakatida vakolatxonalarga ega. Kompaniya energetika, infratuzilma, transport, ko‘chmas mulk va kimyo sanoati kabi turli sohalarda faoliyat yuritadi.