Toshkent, O‘zbekiston (UzDaily.uz) — “Yangi O‘zbekiston” bog‘ida mamlakatimiz davlat mustaqilligining 34 yilligiga bag‘ishlangan bayram tadbiri bo‘lib o‘tdi.

Marosimda O‘zbekiston Respublikasi Prezidenti Shavkat Mirziyoyev nutq so‘zladi.

Davlatimiz rahbari ko‘p millatli xalqimizni, xorijdagi vatandoshlarimizni Istiqlol bayrami bilan tabrikladi.

“Yangi O‘zbekiston g‘oyasi asosida boshlagan ulkan islohotlarimiz tufayli mustaqillik bergan huquq va erkinliklarni har bir yurtdoshimiz o‘z hayotida chuqur his qilib, bu imkoniyatlardan keng foydalanmoqda.

Aynan ana shu ulug‘vor g‘oya asosida biz uch ming yillik boy tarix va madaniyatimizni qaytadan idrok etdik.

Yurtimiz zaminidagi Birinchi va Ikkinchi Renessans anʼanalarini rivojlantirib, Uchinchi Renessans sari dadil amaliy qadamlar qo‘ymoqdamiz.

Ishonchim komil, bu yo‘lda Yangi O‘zbekiston davlati, Yangi O‘zbekiston jamiyati buyuk tariximizni yangi, yana-da yuksak Uyg‘onish davri bilan bog‘laydigan mustahkam ko‘prik bo‘lib xizmat qiladi”, – dedi Prezident.

Prezident Shavkat Mirziyoyev: “Inson qadri uchun, inson baxti uchun” degan ezgu tamoyilga asoslangan Yangi O‘zbekiston g‘oyasi amalda qudratli harakatga aylandi.

Dunyodagi murakkab vaziyatga qaramasdan, iqtisodiyotimiz 6 foizdan yuqori surʼatlarda barqaror o‘sayotgani xalqimiz o‘zi tanlagan yo‘ldan dadil borayotganini ko‘rsatmoqda.

Yurtimiz aholisi yiliga o‘rtacha 700-800 mingga ko‘paymoqda. Mehnat bozoriga har yili 500-600 ming yosh kirib kelmoqda.

Buncha odamni o‘qitish, kasb-hunarli qilish, ularga ish topish o‘z-o‘zidan bo‘lib qolmaydi. Buning uchun, muntazam ishlaydigan tizim, kafolatli investitsiya va infratuzilma kerak.

Shuni oldindan chuqur o‘ylab, biz bu yo‘nalishda aniq dasturlarni qabul qildik”.

Davlatimiz rahbari Yangi O‘zbekistonda tadbirkorlik iqtisodiyotni harakatga keltiruvchi, oldinga boshlovchi katta kuchga aylanganini taʼkidladi.

Keyingi sakkiz yilda yalpi ichki mahsulotimiz 2 karra oshib, o‘tgan yili 115 milliard dollarga, eksport hajmi 26 milliard dollarga yetdi. Yil yakuni bilan yalpi ichki mahsulotimiz 130 milliard dollar bo‘ladi.

Oltin-valyuta zaxiralarimiz tariximizda ilk bor 48 milliard dollardan oshdi. O‘tgan sakkiz yilda yurtimizga qariyb 130 milliard dollar xorijiy investitsiyalar kirib keldi.

Bularning barchasi islohotlar samarasi, taraqqiyotimizning mustahkam kafolati, nufuzli moliya institutlari va xorijiy kompaniyalarning yuksak ishonchi tufaylidir.

“Xalqimizning ko‘z o‘ngida minglab zamonaviy korxonalar, ijtimoiy-iqtisodiy infratuzilma obyektlari qad rostlamoqda.

Eʼtibor bering, bu yil jami 35 milliard dollar investitsiya evaziga 9 mingga yaqin yangi korxona, xizmat ko‘rsatish majmualari barpo etiladi.

Eng ulug‘ bayramimiz arafasida 4 milliard dollarlik 79 ta yirik obyekt ishga tushirildi.

O‘tgan davrda birgina kichik va o‘rta tadbirkorlar soni 2 karra ko‘paydi. Bugun ushbu tarmoqda 10 milliondan ortiq aholimiz mehnat qilib, daromad topmoqda.

Biz yil boshida 5,5 million aholi bandligini taʼminlash bo‘yicha katta marra olgan edik. Sakkiz oydayoq 5 millionlik rejani uddaladik.

Eng muhimi, islohotlarimizga ishonib, shu yilning o‘zida chetda ishlayotgan 700 ming fuqaromiz yurtimizga, o‘z oilasi bag‘riga qaytdi”, – dedi Prezidentimiz.

O‘zbekiston dunyoga keng ochilganidan so‘ng xorijiy sayyohlar soni o‘tgan yili 10 million kishidan, turizm xizmatlari eksporti esa 3 milliard dollardan oshdi.

Tariximiz, milliy o‘zligimizni tiklash maqsadida bunyod etilayotgan Islom sivilizatsiyasi markazi, Samarqanddagi Imom Buxoriy ziyoratgohi kabi ulkan va noyob majmualarda qurilish va obodonlashtirish ishlari yakuniga yetmoqda.

“Ishonchim komil, xalqimizning maʼnaviy salohiyatiga har tomonlama munosib bo‘lgan bunday betakror obidalar aholimiz va jahon jamoatchiligi uchun yangi va jozibador maskanlarga aylanadi.

Bu majmualar tadbirkorlarimizga sayyohlarni yana-da ko‘proq jalb qilishda qo‘shimcha imkoniyatlar eshigini ochadi.

Yana bir maqsadimiz – halol ishlagan tadbirkorlarni qo‘llab-quvvatlash, ularga imkoniyatlarni ko‘paytirishdan iborat.

Shu sababli “Halol mehnat – xotirjam hayot va farovon jamiyat garovi” degan shior asosida “yashirin” iqtisodiyotni jilovlash bo‘yicha muhim chora-tadbirlarni amalga oshirmoqdamiz”, – dedi Prezident.

Iqtisodiyotimiz rivojlanishi, aholimiz ko‘payishi bilan xavfsiz va barqaror energiya resurslariga talab ortmoqda.

O‘tgan sakkiz yilda isteʼmolchilar soni 25 foizga, yaʼni qo‘shimcha 1 million 600 mingtaga, isteʼmol hajmi esa 54 foizga yoki qo‘shimcha 25 milliard kilovatt-soatga oshdi.

Shuning uchun “yashil” energiya ulushini oshirish bo‘yicha misli ko‘rilmagan qadamlar qo‘yilgani taʼkidlandi.

Natijada elektr ishlab chiqarish quvvatlari 2016 yildagi 59 milliard kilovatt-soatdan 85 milliard kilovatt-soatga yetdi, kelasi yilda bu 97 milliard kilovatt-soatdan ziyodni tashkil etadi.

Shu yilning o‘zida 6,5 milliard kilovatt-soat “yashil” energiya ishlab chiqarildi. Eng muhimi, jami generatsiya quvvatlarida “yashil” energiya ulushi 30 foizga yetdi.

2030 yilgacha yana 35 milliard dollar to‘g‘ridan-to‘g‘ri investitsiya hisobidan “yashil” energiya ulushi 54 foizga olib chiqilishi qayd etildi.

“Tabiatga mehrli munosabat orqali kelajak avlodlarga unumdor yer, zilol suv, musaffo havoga ega bo‘lgan go‘zal Vatanni meros qilib qoldirishni muqaddas burchimiz, deb bilamiz.

Shu maqsadda “Yashil makon” umummilliy loyihasi doirasidagi ishlarimizni yana-da kengaytiramiz”, – dedi Prezident.

Keyingi sakkiz yilda yurtimizda 31 million kvadrat metrdan ortiq yoki qariyb 12 mingta ko‘p qavatli uy-joy barpo etilgani tarixiy qadam bo‘ldi.

Shu yilning o‘zida “Yangi O‘zbekiston” va boshqa massivlarda yana 130 ming xonadonli zamonaviy uy-joylar qurilib, aholiga topshiriladi.

2030 yilgacha butun dunyoda qo‘llanayotgan “yashil shahar” standartlari asosida barcha shaharlarimizda yashillik darajasi 30 foizga yetkaziladi.

Natijada mamlakatimiz barqaror energiya bilan taʼminlanadi, ekologiyaga, odamlarimiz salomatligiga zararli taʼsirlar keskin kamayadi.

“Shu bilan birga, master rejalar asosida har bir qishloq va mahallaga shahardagi qulayliklarni olib kiramiz. Kichik shaharlarni zamonaviy infratuzilma asosida rivojlantirib, ularni yangi bosqichga ko‘taramiz”, – dedi davlat rahbari.

Yurtimizda ijtimoiy himoya siyosatining butunlay yangi modeli yaratilgani taʼkidlandi.

Bu tizim xonadonlargacha kirib borgani, ehtiyojmand aholi bilan individual ishlash yo‘lga qo‘yilgani, “Inson” ijtimoiy xizmatlar markazlari tashkil etilgani barcha uchun teng imkoniyat yaratilgan inklyuziv jamiyatni shakllantirishga xizmat qilmoqda.

“Yurtimizda begona odam ham, begona bola ham yo‘q. Barchamiz yagona yurt farzandlarimiz, yagona Vatan ravnaqiga xizmat qilamiz.

Shu maʼnoda, bitta bo‘lsa ham qiyin ahvolga tushib qolgan hamyurtimiz taqdiri barchamizni birdek tashvishga solishi kerak. Chunki xalqimizning eng katta qudrati – mehr-oqibat, saxovat va birdamlikdadir”, – dedi Prezident.

Umuman, bu yilning o‘zida yordamga muhtoj aholini ijtimoiy himoya qilishga 19 trillion so‘m mablag‘ yo‘naltirilmoqda.

Bularning barchasi o‘z samarasini berib, yurtimizda kambag‘allik darajasini 6,8 foizga tushirishga erishildi. Xalqaro tashkilotlar besh-olti yil oldin ushbu raqamni 35 foiz atrofida baholaganini hisobga olsak, qisqa davrda bu borada qanday katta yo‘lni bosib o‘tganimiz yaqqol ayon bo‘ladi.

“Biz tadbirkorlikni rivojlantirish, keksalar, xotin-qizlar, yoshlar, ijtimoiy yordamga muhtoj insonlarni qo‘llab-quvvatlash, kambag‘allikni qisqartirish bo‘yicha ishlarimizga yangi shiddat beramiz.

Xalqimiz uchun munosib sharoitlar yaratish borasidagi islohotlarimiz bir daqiqa ham to‘xtamaydi”, – dedi davlatimiz rahbari.

Sifatli taʼlim-tarbiya, aholi salomatligi kelgusi taraqqiyotimizni hal qiladigan eng muhim masala ekani taʼkidlandi.

So‘nggi sakkiz yilda xususiy sektor bilan birga bog‘chalardagi o‘rinlar ikki yarim millionga, qamrov 78 foizga yetkazildi. Yangi maktablar qurilgani, borlari kengaytirilgani hisobiga qo‘shimcha 1 millionta o‘quvchi o‘rni yaratildi.

Zamonaviy darsliklar, ilg‘or pedagogik texnologiyalar asosida maktab taʼlimiga yangi mazmun, yangi sifat kirib kelmoqda.

Shu davrda oliy taʼlimda ham keskin burilish yasalib, qamrov 9 foizdan 42 foizga yetkazildi. Ayniqsa, talabalarning 53 foizini xotin-qizlarimiz tashkil etayotgani alohida eʼtiborga sazovor.

Hozirgi vaqtda dunyodagi top oliygohlarda 2 mingdan ziyod talabalarimiz tahsil olmoqda. Ulardan 750 nafari “El-yurt umidi” jamg‘armasi orqali davlat hisobidan o‘qimoqda.

“O‘tgan yili yurtimiz yoshlari TOP-500 talik oliygohlarga kirish bo‘yicha Markaziy Osiyoda birinchi o‘rinni egallagani barchamizni albatta quvontiradi. Ayniqsa, farzandlari dunyodagi eng nufuzli universitetlarda taʼlim olayotgan ota-onalarning xursandchiligini so‘z bilan ifoda qilib bo‘lmaydi”, – dedi Prezident.

So‘nggi yillarda tibbiyot uchun mablag‘lar 6 karra oshirildi, sifatli tibbiy xizmatlar mahallagacha tushirildi.

Odamlarimiz yuqori texnologik tibbiy xizmatlar uchun oldin faqat poytaxtga kelardi. Hozir bunday amaliyotlarning 400 dan ortig‘i viloyat va tumanlarning o‘zida bajarilmoqda.

Aholining turmush sharoitlari yaxshilanib borayotgani natijasida o‘rtacha umr ko‘rish darajasi 73,8 yoshdan 75,1 yoshga uzaydi.

“Biz taʼlim-tarbiya uchun, aholi salomatligi uchun, muallim va shifokorlarni qo‘llab-quvvatlash uchun qancha kuch va mablag‘ kerak bo‘lsa, barchasini safarbar etamiz!” – dedi Prezident.

Bugungi yoshlarimizning ovozi, g‘oya va tashabbuslari, kuch-g‘ayrati barcha soha va tarmoqlarga chuqur kirib bormoqda. Ular xalqimizning necha yillik orzu-armonlarini real haqiqatga aylantirmoqda.

Futbol bo‘yicha milliy terma jamoamiz mamlakatimiz tarixida ilk bor jahon chempionati yo‘llanmasini qo‘lga kiritib, 34 yillik orzu-umidimizni ro‘yobga chiqardi.

Talaba yoshlarimiz esa Xalqaro yozgi universiada o‘yinlarida 116 ta davlat orasida ilk bor birinchi o‘n beshtalikka kirdi, Markaziy Osiyoda birinchi o‘rinni egalladi.

Ushbu bayram arafasida 19 va 22 yoshli bokschilarimiz Osiyo chempioni degan yuksak unvonga sazovor bo‘lib, o‘zbek boks maktabining shuhratini dunyoga yana bir bor namoyon etdi.

“Sog‘lom va barkamol avlodni tarbiyalash, O‘zbekistonni chinakam sport mamlakatiga aylantirish maqsadida istiqbolli o‘g‘il-qizlarimizga atab Toshkentda ulkan Olimpiya shaharchasini barpo etdik.

Mamlakatimiz tarixida birinchi marta zamonaviy taʼlim va bilim beradigan Futbol akademiyasi qad ko‘tardi.

Ishonchim komil, zamonaviy sport arxitekturasining noyob durdonasi bo‘lgan ushbu majmualar minglab bo‘lg‘usi chempionlarimiz uchun yuksak parvoz maydoniga aylanadi”, – dedi Prezident.

Shu yilning o‘zida yoshlarimiz nufuzli xalqaro fan olimpiadalarida 2 ta oltin, 8 ta kumush, 5 ta bronza medalini qo‘lga kiritdi.

“Biz Mustaqil Davlatlar Hamdo‘stligi mamlakatlari o‘rtasida kimyodan ikkinchi, matematika va iqtisodiyotda uchinchi, AT va geografiya bo‘yicha to‘rtinchi o‘rinni egallagan o‘g‘il-qizlarimiz timsolida bo‘lg‘usi Xorazmiylar, Beruniylar, Ibn Sinolarni ko‘ramiz.

Saflari tobora kengayib borayotgan bunday intiluvchan, isteʼdodli yoshlar – Yangi O‘zbekistonning oltin avlodi, g‘ururimiz timsolidir.

Bugungi unutilmas damlarda men butun O‘zbekiston yoshlariga qarata aytmoqchiman.

Aziz farzandlarim, doimo yodda tuting: baxt – intilganniki, g‘alaba – kurashganniki. Kelajakni mardlar, tarixni g‘oliblar yaratadi.

Hamisha oldinga qarab intiling, bahodir o‘g‘lonlarim, oqila qizlarim!

Sizlarning ezgu ishlaringizda Vatan, xalq, Prezident barchangizga hamisha tayanch va suyanch bo‘ladi”, – dedi Prezident.

Odil sudlovga erishish uchun sud ishlarini to‘liq raqamlashtirish, inson omilini kamaytirib, sunʼiy intellektdan keng foydalanish borasida faol ish olib borilmoqda.

Iqtisodiy va maʼmuriy ishlar bo‘yicha sud binosiga borib o‘tirishga hojat qolmaydi – taraflar sudda onlayn ishtirok etadi, sudlarda ochiqlik, oshkoralik taʼminlanadi.

Qisqacha aytganda, mamlakatimiz “raqamlashgan va adolatli sud davri” ostonasida turibdi.

Oxirgi uch yilda sudlangan shaxslarning 70 foiziga ozodlikdan mahrum qilish bilan bog‘liq bo‘lmagan jazolar tayinlandi. Uch mingga yaqin fuqaroga esa oqlov hukmi chiqarildi. Jazo muddatini o‘tayotgan va tuzalish yo‘liga qatʼiy kirgan 3 mingdan ziyod yurtdoshimiz afv etildi.

“Bunday tarixiy qadamlar vaqtinchalik kampaniya emas, balki davlat siyosati darajasidagi uzluksiz jarayondir.

Biz “Vatan uchun, millat uchun, xalq uchun!” degan ezgu g‘oya asosida bu ishlarimizni yangi, yuksak bosqichga olib chiqamiz.

Xalqimiz farovonligiga salbiy taʼsir qilayotgan korrupsiya, monopoliya, byurokratiya, dabdababozlik, maʼnaviy tahdidlarga qarshi kurashni keskin davom ettiramiz”, – dedi Prezident.

“Hozirgi murakkab vaziyatni hisobga olib, mustaqilligimizni, yurtimizdagi tinchlik, millatlar va dinlar o‘rtasida hamjihatlikni mustahkamlash uchun kelgusida ham bor kuch va imkoniyatlarimizni safarbar etamiz”, – dedi Prezident.

Davlatimiz rahbari O‘zbekistonning tashqi siyosat borasidagi pozitsiyasini yana bir bor taʼkidladi.

Eng avvalo, Markaziy Osiyo davlatlari bilan ko‘p asrlik do‘stlik, yaxshi qo‘shnichilik, strategik sheriklik va o‘zaro ishonch ruhidagi aloqalarimiz sifat jihatidan yangi bosqichga olib chiqiladi.

Mustaqil Davlatlar Hamdo‘stligi, Shanxay Hamkorlik Tashkiloti mamlakatlari bilan anʼanaviy keng qamrovli va strategik sheriklik aloqalari yana-da kengaytiriladi.

AQSH, Yevropa va boshqa rivojlangan davlatlar bilan savdo-iqtisodiy, moliyaviy, investitsiyaviy va texnologik hamkorlik rivojlantiriladi, keng ko‘lamli sheriklik va amaliy aloqalar mustahkamlanadi.

Janubiy Osiyo, Yaqin va O‘rta Sharq, Afrika mintaqasidagi mamlakatlar bilan yangi va istiqbolli yo‘nalishlarda o‘zaro manfaatli hamkorlik uchun transport-logistika yo‘laklarini yaratishga alohida eʼtibor qaratiladi.

“Afg‘oniston mintaqaviy va global xavfsizlikning muhm omili ekanidan kelib chiqib, ushbu mamlakatning hukumati bilan konstruktiv va amaliy hamkorlik olib borish zarur, deb bilamiz.

Biz Falastin xalqi Birlashgan Millatlar Tashkiloti rezolyutsiyalari bilan tasdiqlangan huquqqa, yaʼni o‘zining mustaqil davlatini barpo etish huquqiga ega, degan qatʼiy pozitsiyamizni yana bir bor bildiramiz”, – dedi Prezident.

El-yurtimiz urush va ofatlar vaqtida og‘ir vaziyatga tushib qolgan begunoh insonlarga doimo beg‘araz yordam ko‘rsatib kelgan.

Insonparvarlik anʼanalarimizga sodiq qolib, O‘zbekistonga olib kelingan Falastin fuqarolariga mehmonlarimiz sifatida zarur ijtimoiy, moddiy va maʼnaviy yordam ko‘rsatish bo‘yicha maxsus farmon qabul qilindi.

Prezidentimiz bag‘rikeng, mehr-oqibatli xalqimiz ushbu farmonda ko‘zda tutilgan chora-tadbirlarni har tomonlama qo‘llab-quvvatlab, ularni amalga oshirishda faol ishtirok etishiga ishonch bildirdi.

Nufuzli xalqaro va mintaqaviy tashkilotlar, moliya institutlari bilan yaqin hamkorlik doimiy eʼtibor markazida bo‘lishi taʼkidlandi.

“Shu kunlarda Xitoyda yana bir yirik anjuman – Shanxay Hamkorlik Tashkiloti sammitida, uning doirasida ko‘plab uchrashuv va tadbirlarda ishtirok etamiz.

Shu sababli Mustaqillik bayramini bugun siz, azizlar bilan, xalqimiz bilan birgalikda nishonlab, el-yurtimizdan duo olib, ertaga yo‘lga chiqishni reja qilganmiz.

Hech shubhasiz, ana shu sammit natijalari ham Yangi O‘zbekistonning dunyodagi o‘rni va mavqeini yuksaltirishga, ko‘p vektorli tashqi siyosat bo‘yicha strategik maqsadlarimizni amalga oshirishga xizmat qiladi.

Fursatdan foydalanib, tantanamizda ishtirok etayotgan xorijiy davlatlarning muhtaram elchilariga, xalqaro tashkilotlar vakillariga samarali hamkorlik uchun chin dildan minnatdorchilik bildiraman”, – dedi Prezident.

Prezident qanday sinov va mashaqqatlar paydo bo‘lmasin, demokratik islohotlarni chuqurlashtirish, milliy birlik va hamjihatlikni mustahkamlash, xalqimizni rozi qilish yo‘lidan aslo ortga qaytilmasligini taʼkidladi.

“Boshlagan buyuk ishlarimizni albatta oxiriga yetkazamiz.

Hech qachon unutmaylik: biz barchamiz bitta xalq, bitta mamlakat, bitta oilamiz! Hammamizning taqdirimiz, kelajagimiz, baxtimiz va yutug‘imiz ham yagona va mushtarak.

Har bir vatandoshimning yutug‘i – bu mening yutug‘im, tashvishi – mening tashvishim, degan fikr bilan yashasak, yutug‘imiz ko‘payib, tashvishimiz albatta kamayib boradi.

Afsuski, dunyoda turli tahdid va xatarlar ko‘p. Ammo ularga qarshi birgalikda, bir tanu bir jon bo‘lib kurashsak, albatta yengamiz.

Bu ulug‘ ayyomda Yangi O‘zbekistonni barpo etishdek olijanob ishga munosib hissa qo‘shayotgan barcha-barcha insonlarga, mehnatkash, bag‘rikeng xalqimizga minnatdorlik bildirib, chin qalbimdan taʼzim qilaman.

Har bir inson, har bir oilaga tinchlik va xotirjamlik, qut-baraka, baxt-saodat hamisha yor bo‘lsin!

Yashasin O‘zbekiston davlati! Yashasin O‘zbekiston xalqi!”, – dedi Prezidentimiz nutqining yakunida.