Toshkent, O‘zbekiston (UzDaily.uz) — 2025-yil 4-mart kuni Oliy Majlis Senati Raisining birinchi o‘rinbosari Sodiq Safoyev Vyetnam Sotsialistik Respublikasi tashqi ishlar vaziri o‘rinbosari Le Txi Txu Xang boshchiligidagi delegatsiya bilan uchrashuv o‘tkazdi.

Uchrashuv chog‘ida O‘zbekiston va Vyetnam o‘rtasidagi hamkorlikni kengaytirish masalalari muhokama qilindi.

Taʼkidlanganidek, O‘zbekiston Vyetnamni Janubi-Sharqiy Osiyodagi muhim va ishonchli hamkorlaridan biri sifatida ko‘radi. Ikki mamlakat o‘rtasidagi aloqalar, jumladan, siyosiy, savdo-iqtisodiy, investitsiya va madaniy-gumanitar sohalarda katta salohiyatga ega ekani qayd etildi.

Uchrashuv davomida tomonlar oliy va yuqori darajadagi tashriflarni tashkil etish bo‘yicha fikr almashdilar. Shu munosabat bilan, ikki mamlakat o‘rtasidagi siyosiy muloqotni faollashtirish, parlamentlararo hamkorlikni mustahkamlash va o‘zaro manfaatli loyihalarni amalga oshirish muhimligi taʼkidlandi.

Shuningdek, ikki davlat o‘rtasidagi aloqalarni rivojlantirishda parlament diplomatiyasining, jumladan Senatning roli oshib borayotgani qayd etildi. Shu munosabat bilan, joriy yilning 5-9 aprel kunlari Toshkent shahrida bo‘lib o‘tadigan Parlamentlararo ittifoqning 150-yubiley assambleyasida Vyetnam parlamenti rahbarlari ham ishtirok etishga katta qiziqish bildirganligi qayd etildi.

Uchrashuv yakunida tomonlar O‘zbekiston va Vyetnam o‘rtasidagi hamkorlikni rivojlantirish borasida konstruktiv muloqot va qo‘shma tashabbuslarni qo‘llab-quvvatlashga tayyor ekanliklarini bildirdilar.