Toshkent, O‘zbekiston (UzDaily.uz) — Gastronomik turizmni rivojlantirish maqsadida 1-3 avgust kunlari Samarqandda ilk bor “Samarqand oshi” festivali o‘tkaziladi. Bu noyob oshpazlik tadbirida butun dunyodan kelgan oshpazlar, sayyohlar va sharq oshxonasi muxlislari mamlakatning boy gastronomik merosini birgalikda targ‘ib etadilar.

“Samarqand oshi” festivali mehmonlarini 200 dan ortiq osh ustalarining musobaqalari, taniqli oshpazlarning mahorat darslari, hunarmandchilik va shirinliklar ko‘rgazmalari, shuningdek, o‘zbek estradasi yulduzlarining konsertlaridan iborat boy madaniy dastur kutmoqda. Xorijlik oshpazlar bellashuvi va “Boqiy shahar” majmuasida 7 tonna Samarqand oshining tayyorlanishi alohida e’tiborni tortadi.

Festival nafaqat ta’m bayrami, balki O‘zbekistonni gastronomik turizm markazi sifatida targ‘ib qilishda muhim qadam bo‘ladi. Bu sayyohlar uchun qadimiy Samarqandni kashf etish va sharqona mehmondo‘stlik muhitidan bahramand bo‘lishning ajoyib imkoniyatidir.