Toshkent, O‘zbekiston (UzDaily.uz) — Qadimiy Samarqand shahrida Jahon Turizm Alyansi (WTA)ning “Ipak yo‘lida turizm” mavzusidagi xalqaro muloqoti bo‘lib o‘tdi.

Ushbu tadbir O‘zbekiston Turizm qo‘mitasi hamda Jahon Turizm Alyansi tomonidan, O‘zbekiston Ekologiya va iqlim o‘zgarishi vazirligi hamda Xitoy Madaniyat va turizm vazirligi ko‘magida tashkil etildi. U jahon turizmini rivojlantirish istiqbollarini muhokama qilish uchun muhim platformalardan biriga aylandi.

Muloqotda BMT Turizmi Bosh kotibi Zurab Pololikashvili, O‘zbekiston Turizm qo‘mitasi raisi Umid Shadiyev, WTA raisi Chjan Syuy, shuningdek, 250 nafardan ortiq mehmon — rasmiylar, xalqaro tashkilotlar vakillari, alyans aʼzolari, sohaning yetakchi mutaxassislari va jurnalistlar ishtirok etdi.

Forum “Ipak yo‘li muloqoti orqali yaxshiroq kelajak sari” shiori ostida o‘tdi. U doirasida plenar sessiyalar, davra suhbatlari, B2B uchrashuvlar, taqdimotlar va tematik sessiyalar tashkil etildi.

Tadbirda turizm aloqalarini kengaytirish, barqaror turizmni rivojlantirish, raqamlashtirish, hamda turistik xizmatlar sifatini oshirish masalalari muhokama qilindi.

Alohida eʼtibor Ipak yo‘li mamlakatlari o‘rtasidagi sayyohlik hamkorligini mustahkamlash, mintaqalararo aloqalarni kuchaytirish, madaniy almashinuv va ekoturizm sohasidagi qo‘shma tashabbuslarga qaratildi.

Forumning O‘zbekistonda o‘tkazilishi mamlakatning Markaziy Osiyoda yetakchi turistik yo‘nalish sifatidagi nufuzini yana-da mustahkamlab, jahon turizm muhokamalaridagi roli oshib borayotganini ko‘rsatdi.

Muloqot yakunida Ipak yo‘li doirasida hamkorlikni yana-da rivojlantirishga qaratilgan takliflar ishlab chiqildi hamda turizm sohasida qo‘shma loyihalar va tashabbuslarni amalga oshirish bo‘yicha kelishuvlarga erishildi.