Toshkent, O‘zbekiston (UzDaily.uz) — Samarqand viloyatida gaz-havo aralashmasi chaqnashi oqibatida 6 kishi halok bo‘ldi. Bu haqda viloyat Favqulodda vaziyatlar boshqarmasi (FVB) maʼlum qildi.

FVB maʼlumotiga ko‘ra, fojia 2025 yil 8 maydan 9 mayga o‘tar kechasi Samarqand shahrining “Bog‘isaroy” mahallasidagi Spitamen ko‘chasida joylashgan uylardan birida sodir bo‘lgan. Uyda gaz-havo aralashmasi yonib ketishi oqibatida portlash yuz bergan.

Shunga ko‘ra, yong‘in-qutqaruv ekipajlari voqea joyiga yetib borib, baxtsiz hodisa oqibatlarini bartaraf etishga kirishgan.

Chaqnash natijasida hosil bo‘lgan kinetik zarbadan uyning temir-beton konstruksiyalari qulashi oqibatida, 1,2,3chi qavatlari va yerto‘la qismi zararlangan. Yong‘in sodir bo‘lmagan.

Olib borilgan harakatlar natijasida vayronalar ostidan 6 nafar fuqaroning jasadi topilgan.

Favqulodda vaziyatlar vazirligi ishchi guruhi rahbarligida Samarqand viloyati FVB boshlig‘i, Prokuratura, IIB, SSB, MG, “Hududgaztaʼminot” va tegishli FVDT xizmatlaridan tezkor – Shtab tuzilib, vaziyat oqibatlarini bartaraf etish ishlari olib borilmoqda. Bunga 10 ta asosiy va maxsus yong‘in-qutqaruv texnikalar va FVDTning kuch, vositalari jalb etilgan.

Mazkur holat yuzasidan dastlabki tergovoldi surishtiruv ishlari olib borilmoqda.