Toshkent, O‘zbekiston (UzDaily.uz) — Saidazim G‘ulyamov rasman UzAuto Motors Powertrain kompaniyasi bosh direktori etib tasdiqlandi. Bu haqda 8 iyul kuni yagona korporativ axborot portalida eʼlon qilingan muhim fakt haqidagi xabarda maʼlum qilindi.

G‘ulyamovning tayinlanishi to‘g‘risidagi qaror 30 iyun kuni bo‘lib o‘tgan aksiyadorlar umumiy yig‘ilishida qabul qilindi. Qarorga asosan, u bilan bir yillik mehnat shartnomasi tuziladi. Bundan avval, 23 iyun kuni kompaniya kuzatuv kengashi uning nomzodini maʼqullagan edi.

Eslatib o‘tamiz, Saidazim G‘ulyamov 2024 yil dekabri oxiridan buyon UzAuto Motors Powertrain bosh direktori vazifasini bajaruvchi sifatida ishlab kelayotgan edi. U ushbu lavozimni Bu Andersson isteʼfosidan so‘ng egallagan. Andersson UzAuto Motors va uning tarkibiy bo‘linmasi Powertrain kompaniyalariga uch yarim yildan ortiq rahbarlik qilgan.

Avvalroq xabar berilishicha, G‘ulyamov vaqtincha bosh direktor lavozimini bajarishi kerak edi va uni doimiy rahbar sifatida tasdiqlash 2025 yil 30 iyundan kechikmay amalga oshirilishi lozim edi. U vaqtincha rahbarlik qilgan davrda unga bosh direktorning barcha vakolatlari berilgan edi.

Maʼlumot uchun: UzAuto Motors bosh kompaniyasida 2025 yil iyun oyida yangi rahbar tayinlandi — Yanosh Kovach bosh direktor lavozimini egallab, Odiljon Bastamqulovni almashtirdi. Bastamqulov esa yanvar oyidan buyon vaqtincha bu lavozimni egallab kelayotgan edi.